СФР 2026 сылга оҕо төрөөтөҕүнэ босуобуйа кээмэйин иһитиннэрдэ

Арассыыйа Социальнай пуондатын Саха сиринээҕи салаата иһитиннэрбитинэн, 2026 сылга олунньу 1 күнүттэн босуобуйа базовай кээмэйэ 28 450,45 солк. тэҥнэһэр. Ол эрээри өрөспүүбүлүкэ олохтоохторугар бу суума чопчу нэһилиэнньэлээх пууҥҥа үлэлиир оройуон коэффициеныгар төгүллэнэр.

2026 сылга Саха сиригэр босуобуйа кээмэйэ:

- 1,4 коэффициеҥҥа – 39 830,63 солк.;

- 1,5 коэффициеҥҥа – 42 675,68 солк.;

- 1,6 коэффициеҥҥа – 45 520,72 солк.;

- 1,7 коэффициеҥҥа – 48 365,77 солк.;

- 2,0 коэффициеҥҥа – 56 900,90 солк.

Төлөбүр бары дьиэ кэргэҥҥэ барыларыгар бэриллэр – дохуот таһымыттан, оҕо ахсааныттан эбэтэр төрөппүт үлэлээҕиттэн тутулуга суох.

Оҕо төрөөтөҕүнэ биир кэмнээх босуобуйаны дойду сиригэр-уотугар куруук олорор РФ гражданнара ылар бырааптаахтар. Төлөбүргэ докумуону оҕо ийэтэ да, аҕата да оҥоруон сөп. Төрөппүт арахсыбыт буоллаҕына, босуобуйаны оҕону кытта олорор төрөппүтэ ылар.

2026 сылга босуобуйаны оҥотторуу судургутуйбут уонна элбэх кумааҕыны хомуйары ирдээбэт. Үлэлиир төрөппүттэр үлэ биэрээччигэ тиийэллэр. Үлэлээбэт дьон сайабылыанньаны үс араас ньыманан түһэриэхтэрин сөп: Госуслуги портал нөҥүө, МФЦ ханнык баҕарар салаатыгар эбэтэр СФР Саха сиринээҕи салаатын клиент сулууспатыгар быһаччы.

Сайабылыанньа оҕо төрөөбүт күнүттэн алта ый устата туттарыллыахтаах. Бу болдьоҕу аһарыы төлөбүр ылар быраабы быһар. Докумуоннары бэйэ хомуйара наадата суох – сөптөөх сибидиэнньэлэри Социальнай пуонда бэйэтэ ирдиир.

Босуобуйаны анааһын туһунан быһаарыы 10 үлэ күнүн устата таһаарыллар. Өскөтүн үчүгэй буоллаҕына, харчы кэлэр биэс үлэ күнүн иһинэн счетка киирэр. Онон сайабылыанньа биэрииттэн үп ылыыга диэри үс нэдиэлэ эрэ ааһар.