Сэрии бэтэрээнэ Мартын Григорьев 100 сааһын бэлиэтээтэ

Сунтаар улууһун, Дьокуускай куорат, Саха Өрөспүүбүлүкэтин Бочуоттаах гражданина, Аҕа дойду Улуу сэриитин, үлэ бэтэрээнэ Мартын Герасимович Григорьев 100 сааһын туолла уонна «Үйэ саас» анал бэлиэнэн наҕараадаланна.
Үйэ саастаах ытык кырдьаҕаһы СӨ Бырабыыталыстыбатын бэрэссэдээтэлин солбуйааччы Георгий Степанов, үлэ уонна социальнай сайдыы миниистирэ Елена Волкова, Дьокуускай куорат баһылыгын солбуйааччы Юрий Петров уо.д.а. эҕэрдэлээтилэр.
Мартын Герасимовиһы үөлээннээҕэ, Аҕа дойду сэриитин кыттыылааҕа, соторутааҕыта 100 сааһын бэлиэтээбит Наум Слепцов эмиэ эҕэрдэлээтэ.
Мартын Григорьев Сунтаар улууһун Кутана нэһилиэгэр 1925 сыл от ыйын 25 күнүгэр биэс оҕоттон бастакынан күн сирин көрбүтэ.
1943 сыллаахха 18 саастааҕар Маньчжурия илиҥҥи кыраныыссатыгар аармыйаҕа сулууспаҕа ыҥырыллар. Милитаристыы Японияны самнарар уоттаах сэриигэ зенитнэй артиллерияҕа отделение хамандыыра буолар. Унньуктаах уһун 7 сыллаах сулууспа кэнниттэн 1951 сыллаахха старшай сержант званиелаах дойдутугар эргиллэн эйэлээх олоҕу тутуһар.
Буҕаалтыр идэлээх кэргэнэ Мария Еремеевна Саввинованы кытта биир уол уонна үс кыыс оҕолоноллор. Хомойуох иһин, кэргэнэ уонна уола олохтон эрдэ туорууллар. 
Мартын Григорьев түөһүн Аҕа дойду сэриитин 2-с истиэпэннээх уордьана, Японияны ылыы иһин, Г.К. Жуков мэтээллэрэ, «Аҕа дойдуну көмүскээччи» анал бэлиэ уо.д.а. наҕараадалар киэргэтэллэр. 
Кырдьаҕас саллаакка кыбартыыра бэлэхтээбиттэрин кэннэ Мартын Герасимович Дьокуускай куоракка көһөн кэлэн, билигин кыыһын кытта олорор, диэн Олохтоох дьаһалта пресс-сулууспата иһитиннэрэр.