Сэрии бэтэрээнэ 104 сааһын туолбут бэлиэ күнүнэн эҕэрдэлээтилэр

Кинини бэҕэһээ, бэнидиэнньик күн, Гагарин уокуругар, бэтэрээн олорор дьиэтин тиэргэнигэр уокурук, дьаһалта, УСЗН үлэһиттэрэ, ИДьМ ансаамбыла, оскуола оҕолоро уонна ыччат дьон эҕэрдэлээтилэр, баҕа санаа бастыҥын анаатылар. Санатан эттэххэ, Семён Колтовской биһигин ыйаабыт бэлиэ сирэ — Бүлүү улууһун Кыргыдай нэһилиэгэ. Холкуоска бригадирдыы сырыттаҕына, 1944 сыллаахха сэриигэ ыҥыраллар. Кини сэбиэскэй - дьоппуон сэриитигэр кыттыбыт. Ытык кырдьаҕас Аҕа дойду сэриитин II истиэпэннээх уордьанынан, «За боевые заслуги», «За победу над Германией», «За победу над Японией» уонна «За безупречную службу» мэтээллэринэн наҕараадаламмыта. Сэрии кэнниттэн Ис дьыала уорганнарыгар үлэлээбит. Бүгүн Семён Иванович — улахан, иллээх дьиэ кэргэн ытык- мааны аксакала, 4 оҕону көччөх гынан көтүтэн, 8 сиэннээх, 7 хос сиэннээх, өрөспүүбүлэкэ киэн туттар, холобур оҥостор дьонуттан биирдэстэрэ.