Сэрэниҥ: Массыанньыктар биэнсийэҕитин блокировкалыыбыт диэн албынныыллар

Массыанньыктар Социальнай эбэтэр Пенсионнай пуондатыттан диэн ааттаан Арассыыйа олохтоохторугар биэнсийэлэрэ тоҥоруллар (блокировкаланар) диэн суруктары ыытан, кинилэри куттаан фишинг сайтка киллэрэн дааннайдарын угалларыгар күһэйэллэрин туһунан СИА-ҕа “Народный фронт” аналитикатын эксперэ Галактион Кучава сэрэтэр.

“Биэнсийэлээххэ Арассыыйа Социальнай эбэтэр Пенсионнай пуондатыттан сурук кэлэр. Маныаха Пенсионнай пуонда туспа тэрилтэ быһыытынан 2023 сылтан үлэлээбэт буолбутун, уонна киниттэн ханнык баҕарар сурук сымыйа буоларын өйдүүр наада. Бу сурукка кинилэр биэнсийэлэрэ тоҥоруллар диэн сымыйа этии баар”, - диир эксперт.

Сыала-соруга диэн дьону куттаан, “Госуслуги” үтүктээйи сайтка киллэрии сигэтин баттыырга күһэйии, онно кинилэр пааспардарын дааннайын, СНИЛС, ИНН уонна, саамай сүрүнэ, SMS-кодтарын киллэртэрэллэр. “Тус аккаунҥа киирэн баран, түөкүттэр сиэртибэ аатыгар кирэдьиит ылыахтарын эбэтэр албыннааһын салгыы түһүмэҕин саҕалыахтарын сөп”, - диэн Кучава эбэн эттэ.

Бу схема иккис түһүмэҕэр массыанньыктар Арассыыйа Баанын, Росфинмониторинг, ФСБ эбэтэр атын судаарыстыбаннай уорганнар үлэһиттэрэ буолан, эмсэҕэлээбит киһини кытта хаттаан сибээстэһиэхтэрин сөп. Кинилэр взломнаммыт тус счет эбэтэр көҥүлэ суох кирэдьиит ылбыттарын туһунан эмсэҕэлээбит киһиэхэ биллэрэллэр уонна бэйэлэрин хонтуруолларыгар баар “харыстабыллаах” счетка харчыны ыыталларыгар этии киллэрэллэр.

“Биир уустук түбэлтэнэн, эмсэҕэлээбит киһини быраабы араҥаччылыыр уорганнар аатыттан “силиэстийэҕэ көмөлөһөргө” мунньуллубут харчытын уу харчынан таһаарарга тылларыгар киллэрэллэр”, - диэн эксперт бэлиэтээтэ.