Семен Данилов чымыдаана

Бу галереяҕа өрөспүүбүлүкэ хайа да түмэлинээҕэр элбэх ыалдьыт сылдьар диэтэхпинэ, сыыспатым буолуо. Ыйга ортотунан 300-400 киһи сылдьар түмэлин киэн туттар экспоната туох эбитий?

Артур Николаевич Егоров – Мытаах түмэл-галереятын дириэктэрэ:

– Саха норуодунай бэйиэтэ, РСФСР М. Горькай аатынан Судаарыстыбаннай бириэмийэтин лауреата Семен Петрович Данилов төгүрүк муннуктаах чымыдаана – биһиги биир киэн туттар экспонаппыт. Чымыдаан матырыйаала мас, саһархайдыҥы-хоҥор өҥнөөх, тимир хатыырдаах, 60х38х22 см кээмэйдээх. Ис өттө 1940 сыллааҕы хаһыаттарынан сыһыарыллыбыт.

Семен Петрович Данилов ыала оҕонньор бэлэхтээбит мас чымыдаанын тутан үөрэххэ киирбит кэмнэрэ

Бу чымыдааны 1937 сыллаахха Даниловтар дьиэлэһэ олорор ыаллара оҕонньор Бүөтүккэ (П.П. Павлов) табаар дьааһыгын фанератыттан илиинэн оҥорбут. Онтун Семен Петровичка Дьокуускайга үөрэнэ барарыгар бэлэхтээбит.