17.05.2024 | 12:00

Сайыҥҥы лааҕырга суруйтардыгыт дуо?

Сайыҥҥы лааҕырга суруйтардыгыт дуо?
Ааптар: Розалия ТОМСКАЯ
Бөлөххө киир

Үөрэх дьыла бүтэрэ чугаһаата. Оҕо сайыҥҥы сынньалаҥын туһунан толкуйдуур кэм кэллэ. СӨ Үөрэххэ уонна наукаҕа министиэристибэтинэн сыллата оҕо сайыҥҥы сынньалаҥын тэрээһинигэр туһуламмыт үлэ былааннаахтык ыытыллар. Маныаха өрөспүүбүлүкэбитигэр анал судаарыстыбаннай бырагыраама үлэлиирин таһынан, федеральнай киинтэн эбии үбүлээһин көрүллэр. Онон оҕо сайыҥҥы сынньалаҥын туһалаахтык тэрийэр бырааптааххытын мүччү тутумаҥ.

Үөрэх министиэристибэтэ иһитиннэрбитинэн, быйыл сайын өрөспүүбүлүкэ үрдүнэн 555 лааҕыр арыллаары турар. Ыам ыйын бастакы күннэригэр лааҕырдар реестрдэрэ оҥоһулунна. Лааҕырдар бары баһаары утары, санитарнай өттүнэн онтон да атын хабааннаах ирдэбиллэргэ эппиэттэһэр докумуоннары толорон туттардылар.

 

555 лааҕырга сайыҥҥы сынньалаҥынан 54000 оҕо хабыллыаҕа, ол иһигэр үлэлиэхтэрэ:

- 433 күнүскү лааҕыр;

- 47 куорат таһынааҕы стационарнай лааҕыр;

- 45 үлэ уонна сынньалаҥ лааҕыра;

- 30 балаакканан лааҕыр.

 

Сайыҥҥы лааҕырдар 80 бырыһыаннара күнүскү буолаллар. Кэнники 2-3 хааччахтаах сылларга уопсай оҕо ахсааныттан 45 бырыһыана хабыллар эбит буоллаҕына, быйыл 55 бырыһыанын хабар былаан баар.

Оскуолаларга, эбии үөрэхтээһин кииннэригэр тэриллэн үлэлиир күнүскү лааҕырдар бэс ыйын 5 күнүттэн саҕалаан үлэлиэхтэрэ. Оттон хонуктаах лааҕырдар “стационарнай” лааҕырдар диэн буолаллар, кинилэр бэс ыйын 15 күнүттэн саҕалаан аһыллаллар.

 

Сайаапкалары ыытыы саҕаланна

Өрөспүбүлүкэҕэ оҕо сайыҥҥы сынньалаҥын сүрүннүүр киин –  “Сосновый бор”, ону таһынан “Энергетик”, “Кэскил” диэн судаарыстыбаннай лааҕырдар бааллар. Маны тэҥэ Сунтаар улууһугар урукку Кэппэндээйитээҕи бадараанынан эмтиир санаторий базатыгар тэриллибит “Сир уустара” оҕо лааҕыра уонна “Малая Академия наук” Хаҥалас улууһугар эбии үөрэхтээһин киинигэр базаланар сайыҥҥы лааҕырдар бааллар.

 

Бэҕэһээҥҥиттэн, ыам ыйын 15 күнүттэн, лааҕырдарга сурутуу саҕаланна. Саха сирэ лааҕырдарга сурутууну электроннай көрүҥҥэ көһөрөн дойду үрдүнэн бастыҥнар кэккэлэригэр киирбитэ ыраатта. Ол курдук, төрөппүттэр дьиэттэн тахсыбакка олорон судаарыстыбаннай өҥөлөр порталларын нөҥүө лааҕырга сайаапканы толоруохтарын сөп.

 

Административнай регламеҥҥа олоҕуран босхо путевкаҕа тиксэргэ лааҕырга суруйтарыы маннык бэрээдэгинэн барыахтаах:

1. Төрөппүт gosuslugi.ru саайтка киирэн «Организация отдыха детей в каникулярное время» диэн сыһыарыыны баттаан сайаапка толорор;

2. Төрөппүт бэйэтэ оскуолаҕа, эбии үөрэхтээһин киинигэр, лааҕырга тиийэн сайаапкатын биэрэр.

 

Маны таһынан, киин куораппытыгар оҕону быстах болдьоххо сайыннарар куурустарга үөрэтэр, сынньатар чааһынай тэрилтэ үгүс. Төрөппүттэр маннык кииннэр лицензияларын, бэрэбиэркэлэри ааспыт докумуоннарын бэйэлэрэ ирдэһиэхтээхтэр.

 

Квоталар түҥэтиллэн тураллар

«Сосновый бор», «Кэскил», уонна «Энергетик» судаарыстыбаннай лааҕырдарга Оҕо сынньалаҥын уонна чэбдигириитин тэрийиигэ үлэлиир биэдэмистибэлэр икки ардыларынааҕы хамыыһыйа квоталары киин куорат уокуругар уонна муниципальнай тэриллиилэргэ ыытар. Улуустар Үөрэхтээһин управлениетыгар суруйтарыахтарын сөп.

Сүүмэрдээһиҥҥэ араас чэпчэтиилэр элбэх оҕолоохторго, соҕотох ийэлэр оҕолоругар, анал байыаннай дьайыы кыттыылаахтарын оҕолоругар о.д.а. көрүллэллэр – маны барытын олохтоох Үөрэхтээһин управлениелара учуоттаан, оҕолору босхо лааҕырга сүүмэрдииллэр.

 

«Сосновый бор», «Кэскил» уонна «Энергетик» сынньалаҥ кииннэригэр 2024 сылга 1200 оҕо сынньанара былааннанар, ол иһигэр 180 анал байыаннай дьайыы кыттыылаахтарын оҕолоро хабыллыахтара.

 

Краснодарскай кыраай лааҕырдарыгар сурутуу олохтоох Үөрэхтээһин управлениеларын нөҥүө ыытыллар. Быйыл 480-тан тахса анал байыаннай дьайыы кыттыылаахтарын оҕолоро  «Чэбдик», «Дружба», «Сир уустара» лааҕырдарга, 900-тэн тахса оҕо Краснодарскай кыраай лааҕырдарыгар сынньаныахтара. Бу лааҕырдарга сурутуу эмиэ олохтоох Үөрэхтээһин управлениеларын нөҥүө ыытыллар.

 

Арассыыйа лааҕырдарыгар хайдах суруйтарабыт?

«Артек», «Орленок», «Океан», «Смена» уонна Краснодарскай кыраай лааҕырдарыгар сурутуу “Путевка” диэн автоматизированнай систиэмэ нөҥүө ыытыллар.

Сочига баар “Сириус” үөрэхтээһин киинигэр барарга уһулуччу ситиһиилээх оҕолор хабыллыахтарын сөп.

Төрөппүт оҕотугар АИС “Путевка” регистрацияны ааһар, ситиһиилэрин туоһулуур наҕараадаларын киллэрэллэр, баҕарар симиэнэлэригэр сайаапка ыыталлар уонна кэтэһэллэр. Ханнык баҕарар федеральнай лааҕыр порталлаах, онно киирэн эмиэ сайаапка толоруохха сөп. Сүүмэрдээһин куонкурус быһыытынан ыытыллар, симиэнэ саҕаланыан биир ый иннинэ эппиэт кэлэр. Путевка бэрилиннэҕинэ, регионнааҕы оператор испииһэккэ киллэриэхтээх.

Бу лааҕырдарга быйыл 600-тэн тахса путевка түҥэтиллэн турар. Ону таһынан, төлөбүрүн 50 бырыһыанын уйунуу, бырайыаһын уйунуу о.д.а. ньымалар бааллар.

 

4 муниципальнай лааҕыр

Дьокуускай лааҕырдарыгар сурутуу бара турар. Эмиэ судаарыстыбаннай өҥөлөр порталларын нөҥүө сайаапкаҕытын ыытаҕыт.

Үөрэхтээһин управлениета иһитиннэрбитинэн, быйыл Дьокуускайга 4 стационарнай лааҕыр үлэлиэҕэ – “Радуга” (Саха политехническэй лицей), “Каландарашвили” (31-ис нүөмэрдээх оскуола), “Родничок” (21-ис нүөмэрдээх оскуола) уонна “Спутник” ( 2-ис нүөмэрдээх оскуола).

Маны таһынан бары үөрэх уонна эбии үөрэхтээһин тэрилтэлэрин базаларыгар күнүскү лааҕырдар тэриллэллэр.

 

Оҕо сайыҥҥы сынньалаҥын тэрийиигэ мунаахсыйар ыйытыыларгытын Оҕо сынньалаҥын уонна чэбдигириитин ресурснай киинигэр эрийэн билсиэххитин сөп: 8-800-550-14-21.

 

***

Билигин Дьокуускайга 4 муниципальнай лааҕыр "Радуга" (урут "Строитель” диэн ааттааҕа), "Каландарашвили", "Родничок" ("Труд"), "Спутник" бааллар; уонна өрөспүүбүлүкэтээҕи таһымнаах "Сосновый бор", "Кэскил", "Энергетик" үлэлииллэр.

80-ус сыллардаахха "Сокол", "Геолог", "Металлург", "Медик", "Огонек", Зоя Космодемьянская, Олег Кошевой ааттарынан, "Здоровье", "Юннат" диэн лааҕырдар бааллара. Билигин ол сирдэргэ чааһынай коттеджтар дьэндэһэн тураллар. 1990-2000 сыллардаахха пионерскай лааҕырдар сирдэрэ чааһынайдарга түҥэтиллибитин содулугар, билигин нэһилиэнньэтэ эбиллэ турар куораппытыгар 4 эрэ лааҕырдаахпыт. Куорат нэһилиэнньэтэ икки төгүл улааппыт кэмигэр лааҕырбыт ахсаана 1,5 төгүл кыччаан турар. Онон тустаахтарга сайыҥҥы лааҕырга миэстэҕэ тиксии эмиэ үчүгэй уһуйааҥҥа, оскуолаҕа тиксии курдук бэрт эрэйинэн ситиһиллэр, туспа дьол буолан буолан турар.

Сонуннар

Ордук ааҕаллар

Былатыан Эверстов:  «Элбэх дьоҥҥо сонуну кэпсиир кыахтаах буолар — дьол»
Дьон | 06.06.2024 | 10:00
Былатыан Эверстов: «Элбэх дьоҥҥо сонуну кэпсиир кыахтаах буолар — дьол»
Хас сир аайы ураты дьон баар буолар. Кинилэр олохторун хара маҥнайгыттан атыннык олоро сатыыллар. Барыларыгар баар курдук нус-хас дьылҕаҕа дураһыйбаттар. Оннук дьикти киһинэн Дьааҥы улууһугар олорор эрээри, өрөспүүбүлүкэ, дойду, аан дойду үгүс бэлиэ спортивнай түгэннэрин көтүппэккэ хамнаһа суох сырдатар суруналыыс, киэҥ сырыылаах айанньыт, коллекционер, фотограф, спортсмен, норуот тапталын ылбыт Платон...
Татьяна Гоголева:  «Төрөөбүт тылын билбэт ыччат ханна да сыаналаммат»
Дьон | 13.06.2024 | 10:00
Татьяна Гоголева: «Төрөөбүт тылын билбэт ыччат ханна да сыаналаммат»
«Хотугу сулус» оҕо телерадиоакадемиятын төрүттээбит, үгүс көлүөнэ талааннаах ыччаты көччөх гынан көтүппүт Татьяна Гоголева, чахчы, Саха сиригэр тыыннаах номох буолбут киһи. СӨ култууратын үтүөлээх үлэһитэ, СӨ култууратын, социальнай эйгэтин туйгуна, «Гражданскай килбиэн» бэлиэ хаһаайына олоҕун тухары оҥорбута, айбыта-туппута, үйэтиппитэ үгүс.   Кини туһунан бу иннинэ сурулунна ини, суруллубата ини. Ол эрээри...
Элбэх оҕолоохторго — ураты болҕомто
Сонуннар | 06.06.2024 | 16:00
Элбэх оҕолоохторго — ураты болҕомто
2024 сыл ыам ыйын 28 күнүгэр ыытыллыбыт Ил Түмэн сэттис (уочараты таһынан) пленарнай мунньаҕар норуот дьокутааттара «Саха Өрөспүүбүлүкэтигэр элбэх оҕолоох ыал статуһун туһунан» өрөспүүбүлүкэ сокуонугар уларытыылары киллэриини өйөөтүлэр.   Санатан эттэххэ, дойду баһылыга Владимир Путин 2024 сыл тохсунньу ыйыгар элбэх оҕолоох дьиэ кэргэттэр статустарын болдьоҕо суох оҥорбута. Ол эбэтэр үс уонна...