Сайсарыны сайыннарыы салҕанар

Эбийиэк тутуутун уопсай бэлэмэ 37% тэҥнэһэр. 4066 кв. миэтэрэ иэннээх дьиэ монолитнай каркаһа дьэндэйбит.

Билигин исписэлиистэр инженернэй ситимнэри тардыыга уонна дьиэ тас өттүн бүрүйүүгэ ылсан эрэллэр. Тутуу үлэтэ тигинэччи барар: эбийиэккэ 30-тан тахса киһилээх биригээдэ уонна онно туһааннаах анал тиэхиньикэ үлэлиир.

Саҥа уһуйаан 240 оҕоҕо (12 бөлөххө) суоттаммыт. Куорат бу эргин түөлбэлэригэр дьааһылаҕа миэстэ тиийбэт кыһалҕатын быһаарыахтаах.

Эбийиэк 2027 сыл IV кыбаарталыгар үлэҕэ киириэхтээх. Бэдэрээтчит – «Монтажник» ПК. Бу туһунан Дмитрий Садовников МАХ ханаалыгар иһитиннэрдэ.

Баһылык чугастааҕы сири-уоту тупсарыы бырайыакка киирэн сылдьарын тоһоҕолоон бэлиэтээтэ. Ону таһынан, идэлээх сулууспаларга ыкса сытар сирдэри сайыннарар мэхэньиисими тобуларга сорудахтаабытын иһитиннэрдэ.

“Бу эргин хаарбах туруктаах мас дьиэлэри көтүрүү уонна олохтоохтору көһөрүү боппуруоһун көтөҕүөхпүт. Куорат биирдиилээн учаастактарынан буолбакка, бүтүн түөлбэлэринэн саҥардыллыахтаах”, – диэн санаалаах баһылык.