Сайсары уокуругун кэлимник сайдар кэмэ чугаһыыр!

Дьокуускай куорат уокуруктааҕы дьаһалтата уонна «ЖСК Маяк» анал тутааччы ХЭУо куорат 75, 84, 111 уонна 112 кыбаарталларын тилэри хабар территориялары кэлимник сайыннарар туһунан дуогабары түһэристилэр. Мэр Дмитрий Садовников уонна тутар хампаанньа дириэктэрэ Николай Поскачин илии баттаатылар.

Бу киэҥ хабааннаах бырайыак 15 сылга суоттанан оҥоһуллубута уонна Дьокуускай куорат аныгылыы тас көстүүтүн оҥорууга биир төһүү суолтаны ылыахтааҕа этиллэр.

Тупсаран, саҥардан оҥоһуллуохтаах сир уопсай иэнэ 29,6 гааҕа тэҥнэһэр. Бу бырагыраама чэрчитинэн, 250 тыһ. кв миэтир иэннээх саҥа олорор дьиэни тутан, үлэҕэ киллэрэргэ суоттаналлар.

Бу быраыйыак биир тутаах социальнай суолтата – итиннэ тутуллар саҥа дьиэлэргэ куорат хаарбах туруктаах, элбэх кыбартыыралаах 38 дьиэтин олохтоохторун көһөрүөхтэрэ.

Ити дьиэлэртэн күн бүгүн 32 дьиэтэ саахалланар туруктаахха киирсэр.  Биир бастакынан Ново-Карьернай уулусса 42/3 №-дээх дьиэтин олохтоохторун көһөрүөхтэрэ. Ону кэлэр 2027 сыл ахсынньы 24 күнүгэр диэри олоххо киллэрэргэ суоттаналлар.

Ону таһынан социальнай уонна инфраструктура тутаах базаларын тутуохтара.  Ити иһигэр 990 миэстэлээх оскуола, 350 миэстэлээх уһуйаан, симиэнэҕэ 180 киһи сылдьар кыахтаах саҥа поликлиника дьэндэйиэхтээхтэр.

Сайсары сиригэр-уотугар сабсы-саҥа, астык уопсастыбаннай туоналар, парковкалаах зоналар, атыы-тутуу кииннэрэ эбиллиэхтэрэ.

Бу баараҕай уонна уһун кэмнээх бырайыак сүүһүнэн олохтоох дьон олорор усулуобуйатын эрэ тупсарыынын муҥурдаммат. Аныгы, сайдыылаах кэм ирдэбилигэр толору эппиэттиир инфраструктура кичэйэн оҥоһуллуо.

Бу туһунан куорат уокуруктааҕы дьаһалтатын пресс-сулууспата иһитиннэрэр.