Сайаана Попова: «Бэйэбинэн киэн туттубутум!»

Ыам ыйын 5-10 күннэригэр Москваҕа ыытыллыбыт норуоттар икки ардыларынааҕы «Послы Победы. Москва» слекка Саха сириттэн күүстээх куонкуруһу ааһан, М.К. Аммосов аатынан ХИФУ РФ Хотугулуу-Илиҥҥи норуоттарын тылларын уонна култуураларын институтун устудьуона Сайаана Попова уонна Ленскэй оройуонун Витим бөһүөлэгин орто оскуолатын историяҕа, обществознаниеҕа учуутала Ольга Бутакова кыттар чиэскэ тиксибиттэрэ.
Бу слекка бүтүн Арассыыйа үрдүнэн уопсайа 200 волонтер сүүмэрдэнэн, слет бырагырааматынан үөрэнэн, култуурунай тэрээһиннэргэ сылдьан баран ыам ыйын 9 күнүгэр Кыһыл болуоссакка буолбут Кыайыы парадыгар кытыннылар. Дойдубут тэбэр сүрэҕэр үбүлүөйдээх Кыайыы параадыгар кыттан кэлбит Сайаана Попова историяҕа хаалар бу бэлиэ тэрээһин туһунан санаатын үллэстэр:
– «Кыайыы волонтердарын» сүүмэрдээһиҥҥэ киирээри куонкурус биллэрбиттэригэр, кылгас видео устубуппут. Бэйэбин билиһиннэрэн, хос эһэм Аҕа дойду Улуу сэриитигэр кыттыбытын туһунан сырдатан, куонкурус ирдэбилинэн чопчу тоҕо мин кыайыахтаахпын этэн туран, ВКонтакте социальнай ситимҥэ таһаарбытым. Сүүмэрдээһини ааһан, Саха сириттэн Ольга Бутакова диэн учууталы кытта барбыппыт. Бастаан барарбытыгар билсибэт этибит. Онно тиийэн көрсөн, алтыстыбыт. 
Слет кэмигэр элбэх араас оҕону кытта билсистим. Оҕолору эрэ кытта диир тутах буолуо. Бу диэн эттэххэ, мин саастыылар аҕыйах этибит. Бу сылга сааһынан хааччахтааһын суох буолан, аҕа саастаах дьон эмиэ үгүстэр этэ. Олуһун кэрэ эйгэлээх, биир санаалаах дьоммун кытта билсистим. Өссө биир санаабын сылаанньыппыт түгэн бэтэрээни кытта көрсүһүү этэ. Бэйэтэ Питертэн сылдьар эрээри, сахалары кытта көрсүөн баҕарбыт этэ; тоҕо диэтэр кини хас да сыл Саха сиригэр үлэлии сылдьыбыт. Саха дьонун олус хайҕаабыта, олус чиэһинэй, харчыга охтубатах кэрэ дьон диэн олус истиҥ тыллары эппитэ. Бу тыллартан биир дойдулаахтарбынан өссө ордук киэн туттубутум. Волонтердары кытта ыкса алтыһан, билсиһэн слет олус сэргэхтик ааста.  
Парадка кыттыы туһунан эттэххэ, дьиҥэр, эмоция, өйгө хаалар түгэн диэн элбэх бөҕө буоллаҕа дии... Ис сүрэхпиттэн олуһун долгуйбутум, күүппүтүм, үөрбүтүм уонна бэйэбинэн киэн туттубутум! Москва парада чахчы да олус улахан, сүҥкэн хабааннаах диэн сөпкө этэллэр эбит!