“Саталга” тимир суолу кытта ситимнээх хааччах тохтуур буолла

Бэйэтин кэмигэр күүтүүлээх тимир суолбут күргэ тутуллан, эбэни туораан, бу эҥээргэ кытта баар буолуо диэн сырдык былаан баара. Онон федеральнай таһымнаах тимир суол инфраструктуратыгар наада диэн, куорат кытыыларыгар, чопчута, “Сатал” СОНТ кэккэ учаастактарын, онно баар тутууну бэйэ быраабыгар суруттарыыга  хааччахтааҕа. Онон  туһааннаах дьонугар улахан кыһалҕа этэ.

Бэҕэһээ Ил Дархан Айсен Николаев 3 чаастан тахса уһуннаах Быһа эпииргэ кытынна. Онно элбэх этилиннэ. О.и. ити этиллэр хааччах тохтуурун туһунан иһитиннэрдэ. Өрөспүүбүлүкэ салалтата Тырааныспар уонна суол хаһаайыстыбатын министиэристибэтин, куорат уокуруктааҕы дьаһалтатын кытта Судаарыстыбаннай дуума дьокутаата Галина Данчикова өйөбүлүнэн ити хааччаҕы тохтоторго улахан үлэни ыытан, кыһалҕа быһаарыллыбытын бэлиэтээтэ.

 “Чуолаан тимир суолу кытта ситимнээх хааччах тохтуур буолла. Дойдуга тыын суолталаах магистрал “Аллараа Бэстээх – Магадан” туһаайыытынан барара быһаарыллыбыт түгэнигэр бу курдук киэҥ сиринэн тайыыр сири тыыттарбакка, дьону хааччахтаан олорор төрүөт суох”, – диэтэ. Салалта дойду Бырабыыталыстыбатыгар хаста да ити боппуруоһунан тахса сылдьыбытын, тус бэйэтэ эмиэ территорияны былаанныыр үлэҕэ саҥалыы сыһыан, хаттаан көрүү наадатын туруорсубутун үллэһиннэ.

Бүгүҥҥү күннээххэ Өлүөнэни туоруур күргэ тутуута саҕаланан, итиннэ сыһыаннаах стратегическай суолталаах докумуоннар хаттаан көрүллэн, чопчуланан,  боппуруос олохтоохтук быһаарыллыбыт.

Бу туһунан АГиП пресс-сулууспата иһитиннэрэр.