«Сатал» кыһалҕата баһылык тус приемугар көрүлүннэ

От ыйын 14 күнүгэр баһылык Евгений Григорьев уочараттаах тус приемугар «Cатал» СНТ бэрэссэдээтэлэ Евдокия Лукачевская кэлэ сырытта.
СНТ бэрэссэдээтэлэ Намныыр суол 14-с км турар сылаас тохтобулу "Саталга" көһөрөн аҕаларга этии киллэрдэ эрээри, эбийиэги көрөр-истэр үптэрэ суоҕун быһаарда. 
Нам суолун 14 км туруоруллубут сылаас тохтобул өрөспүүбүлүкэ таһымнаах «Нам» массыына суолун эбийиэгэ буоларынан, Евгений Григорьев бу боппуруоһу өрөспүүбүлүкэ салалтатын кытта cүбэлэһиэх буолла.
Евдокия Лукачевская маны сэргэ Севастьяновская уулусса сорох кэрчигин куорат балаансатыгар ыларга этии киллэрдэ. Ол эрээри «Сатал» түөлбэ электроэнергияҕа иэстээҕинэн тэрилтэ счета арестанан турарынан, суолга өрөмүөн ыытарга, сырыыны тэрийэргэ наадалаах эбийиэк тэхиньиичэскэй пааспарын бэлэмниир сатамматын иһитиннэрдэ.
Кэпсэтии маны таһынан СНТ территориятын тас өттүгэр хаалбыт кыбаарталлары таарыйда. Евгений Григорьев маныаха куоракка оҥоһуллубут хоромньу кээмэйин ааҕар силиэстийэ түмүктэнэрин кэтэһэргэ этии киллэрдэ, диэн Олохтоох дьаһалта пресс-сулууспата иһитиннэрэр.
Санатар буоллахха, баһылык гражданнары кытта эрдэттэн суруйтарыынан көрсөр. Көрсүһүүгэ суруйтарарга Сурук отделыгар эбэтэр Олохтоох дьаһалта тэрилтэлэригэр сайабылыанньа суруйуохха наада. Сайабылыанньаҕа быһаартарыахтаах боппуруоһу сиһилии ыйар уонна инники өттүгэр атын инстанцияларынан туох быһаарыы ылыллыбытын сыһыарар наада. Маны сэргэ тус дааннайдары ыйар ирдэнэр: төлөпүөн нүөмэрэ, электроннай аадырыс.
Сайабылыанньаны ыытар ньымалар:
– yakutsk@sakha.ru Олохтоох дьаһалта официальнай электроннай почтатыгар;
– 40-80-76 төлөпүөнүнэн;
– Дьокуускай к., Ленин проспега, 15 аадырыска тиийэн;
– Сурук отделын аадырыһа: Дьокуускай к., Ленин проспега, 15, 113 кэб., үлэ күннэригэр сарсыарда 09:00 чаастан киэһэ 18:00 чааска диэри (эбиэккэ тохтобул – 13:00-14:00 чч.).