«Сатал» дьиэлэрэ сокуонунан көмүскэллээх буоллулар

Куорат дьокутааттара «Сатал» олохтоохторун бырааптарын сокуонунан көмүскээтилэр.

Ахсынньы 24 күнүгэр буолан ааспыт Куорат дууматын уочараттаах 22-с сессията Дьокуускай куоракка сири туһаныы уонна тутууну ыытыы быраабылатын туһунан 169 №-дээх нуорма-быраап аактатыгар уларытыылары киллэрдэ. Cанатар буоллахха, СӨ Үрдүкү суута бу Быраабыла балаһыанньатынан «Сатал» СНТ 9-с, 10-с, 11-с уонна «Молодежнай» кыбартааллара (бу территориялары тыа хаһаайыстыбатын аналыгар туттуллуохтаах С-1 категорияҕа киллэрэр балаһыанньа) федеральнай сокуоҥҥа сөп түбэспэттэр диэн быһааран турар.

22-с сессия быһаарыытынан киирбит уларытыылар нэһилиэнньэ быраабын көмүскүүр аналлаахтар. Ол эбэтэр территорияны С-1 көрүҥтэн С-2а көрүҥҥэ көһөрүү тутуллубут эбийиэктэри сокуонунан көмүскүүр. Бэлиэтээн эттэххэ, сирдэр аналлара оннунан хаалбыт. Оттон дьиэлэрин көҥүлэ суох туттубуттарын иһин көтүрэргэ сэрэтии ылбыт дьон бырааптара көмүскэннэ.