Сарсын сайыҥҥы лааҕырдарга суруйтарыы саҕаланар

Сайабылыанньаны электроннай көрүҥүнэн «Госуслуги» портал нөҥүө бэриллэр. Төрөппүттэр тус кэбиниэккэ киирэн сайабылыанньа толороллор. Бэлиэтээн эттэххэ, путевка номнуо ылыллыбыт буоллаҕына, оҕо ханнык эмит биричиинэнэн барбат түгэнигэр, болдьоҕун уларытар кыаллыбат — миэстэттэн аккаастаныахха наада.

Электроннай көрүҥүнэн сайабылыанньа биэрэр кыаллыбат буоллаҕына, талар лааҕырга офлайн көрүҥүнэн биэриэххэ эмиэ сөп.

Сайын устата бэйэ атыыласпыт путевкатын уонна айан төлөбүрүн сорох чааһын толуйуу көрүллэр. Субсидия кээмэйэ — 15 813 солкуобай, бу суума путевка толору сыанатыттан көҕүрэтиллэр. Путевка сыаната араастаһарынан, хаалбыт сууматын хас биирдии лааҕырга туспа төлөнөр.

Бэлиэтээн эттэххэ, анал байыаннай дьайыы кыттыылаахтарын оҕолоро уочарата суох путевка ылар бырааптаахтар.

Дьокуускай куорат хонуктаах лааҕырдара

Дьокуускай куорат сиригэр-уотугар оҕолору түөрт  хонуктаах лааҕыр 2–4 сменанан сынньалаҥҥа күүтэр.

1. «Спутник».  4 сменалаах, уопсайа 900 миэстэҕэ ыҥырар.

Сменалар кэмнэрэ:

1 смена: бэс ыйын 15 күнэ – от ыйын 5 күнэ;

2 смена: от ыйын 8 күнэ – от ыйын 28 күнэ;

3 смена: от ыйын 31 күнэ – атырдьах ыйын 7 күнэ;

4 смена: атырдьах ыйын 10 күнэ – атырдьах ыйын 17 күнэ.

2. «Радуга». 2 сменалаах, уопсайа 280 миэстэ.

Сменалар кэмнэрэ:

1 смена: бэс ыйын 15 күнэ – от ыйын 5 күнэ;

2 смена: от ыйын 8 күнэ – от ыйын 28 күнэ.

3. «Каландаришвили». 3 сменалаах, уопсайа 350 миэстэ.

Сменалар кэмнэрэ:

1 смена: бэс ыйын 15 күнэ – от ыйын 5 күнэ;

2 смена: от ыйын 9 күнэ – от ыйын 29 күнэ;

3 смена: атырдьах ыйын 2 күнэ – атырдьах ыйын 11 күнэ.

4. «Арктика уонна космос». 2 сменалаах, уопсайа 120 миэстэ. Программирование, инженернэй толкуй уонна хамаанданан үлэ сатабылларын сайыннарыыга туһуланар.

Сменалар кэмнэрэ:

1 смена: бэс ыйын 13 күнэ – от ыйын 3 күнэ;

2 смена: от ыйын 7 күнэ – от ыйын 27 күнэ.

* * *

Атырдьах ыйыгар «Радуга» лааҕыр баазатыгар «Путь Росомахи» балаакканан лааҕыр үлэлиэҕэ, манна оҕолору саҥа уонна интэриэһинэй арыйыылар күүтэллэр: туристар походтара, сири-уоту кэрийии, спортивнай күрэхтэһиилэр уонна маастар-кылаастар.

Ол кэмҥэ «Арктика уонна Космос» ДЗСОЛ баазатыгар «Звезда» балаакканан лааҕыр аһыллыаҕа, хамаанданан үлэҕэ, күүс-уох өттүнэн сайдыыга, бэйэни кыанарга туһуланар. Бу күннэргэ оҕолор байыаннай бэлэмнэнии, туризм, спорт сатабылларын баһылыахтара уонна кэлэр кэм технологияларын кытта билсиэхтэрэ.

Күнүскү лааҕырдар

Куоракка хаалар оҕолорго оскуолалар уонна үөрэх тэрилтэлэрин баазаларыгар эмиэ лааҕырдар үлэлиэхтэрэ. Уопсайа 54 лааҕыр 5 487 оҕону хабыаҕа. Ону таһынан коррекционнай оскуолалар баазаларыгар 4 лааҕыр 97 оҕону хабар.

Инклюзивнай сынньалаҥ уонна өйөбүл

Уустук олохтоох оҕолорго ураты болҕомто ууруллар. Кинилэргэ «Труд» ДЗСОЛ баазатыгар «Сайын» ресурснай комплекс үлэлиэҕэ, манна 3 смена (ол иһигэр эбии) устата 140 оҕо сылдьыаҕа.

Сменалар кэмнэрэ:

Уустук балаһыанньалаах оҕолорго смена: бэс ыйын 8 күнэ – бэс ыйын 17 күнэ;

Аутизмнаах оҕолорго эбии смена: бэс ыйын 22 күнэ – от ыйын 1 күнэ;

Иккис сүрүн смена: от ыйын 6 күнэ – от ыйын 15 күнэ;

Үһүс смена: атырдьах ыйын 3 күнэ – атырдьах ыйын 12 күнэ.

Туох баар ыйытыыларгытын Дьокуускай үөрэххэ управлениетын төлөпүөнүттэн ыйыталаһыаххытын сөп: 507-311.