Сарсыарда тугу сиигитий?
Сарсыарда аһаабат киһи уойарга барар, диабеттыан, сүрэх ыарыыланыан сөп диэн исписэлиистэр сэрэтэллэр. Сарсыарда хайдах үссэнэбит да, күммүт оннук салаллыахтаах.
“Сарсыардааҥҥы аһылык – киһи сүрүн аһылыга. Кини килиэккэлэри аһатыахтаах, энергия уонна уу биэриэхтээх. Сарсыарда тотоойутук аһаабыт киһи киэһэ элбэҕи аһаабат”, – дииллэр Уопсастыбаннай доруобуйа киинин исписэлиистэрэ.
Чинчийиилэр көрдөрөллөр: сарсыарда аайы иҥэмтиэлээхтик аһыыр дьон күүрүүгэ киирэллэрэ аҕыйах, уойбаттар уонна иммунитеттара күүстээх буолар.
Сарсыардааҥҥы аһылык күнү быһа барар энергияны биэриэхтээх, ол иһин белок, сыа, углевод баар буолуохтаах. Саамай туһалаах сарсыардааҥҥы аһылык – хааһы, сыыр, сымыыт, туораахтаах бурдугунан оҥоһуллубут килиэп. Калорийын ылан көрөр эбит буоллахха, сарсыардааҥҥы аһылыкка күннээҕиттэн 40% тиксиэхтээх.
ТОП 5 . Сарсыардааҥҥы аһылык
- Эриэхэлээх, мүөттээх овсянка. Уустук углеводтардаах, туһалаах сыалардаах, мэйии үлэтин тэтимирдэр.
- Отонноох, эриэхэлээх иэдьэгэй – белок уонна кальций элбэх.
- Оҕуруот астаах, күөх тумалаах омлет – белок уонна клетчатка.
- Авокадолаах тост уонна пашот-сымыыт – туһалаах сыалар уонна белок. Өр тот сылдьаҕыт.
- Отонноох чиа пудинг – Омега 3 уонна клетчатка баар.
Уопсастыбаннай доруобуйа кииниттэн чэгиэн буоларга төһүү буолар сарсыардааҥҥы аһылык ырысыаба:
Бу сарсыардааҥҥы аһылык күнү быһа кэлэр-барар, элбэҕи үлэлиир былааннаах буолаххытына барсар. Туһалаах сыалар уонна Омега3 мэйии үлэтин тупсараллар, белок өр тот сылдьарга көмөлөһөр.
- Сымыыт – 2-3 уст.,
- Туустах форель эбэтэр лосось балык – 50 г,
- Шпинат – 1 сүүмэх.
- Авокадо – ½ уст.
- Черри помидор,
- Туораахтаах бурдуктан килиэп;
- Оливка арыыта.
- Сымыыты ытыйан баран оливкалаах арыынан сотуллубут хобордооххо буһара уурабыт.
- Омлет буһан эрдэҕинэ шпинат уонна балык быраҕабыт.
- Омлеппытын авокадоны, килиэби, помидоры кытта сиибит.
Сарсыарда тотоойутук уонна иҥэмтиэлээхтик аһааһын – чэгиэн буолуу, уһун үйэлэнии төрдө.
Сонуннар
Ордук ааҕаллар
