«Сардаҥа» хаалыктаах хаамыы түмсүүтүн 10 cыла

Куорат хаалыктаах хаамыыны сэргээччилэрин биир бастыҥ түмсүүтэ «Сардаҥа» быйыл Арассыыйаҕа ыытыллыбыт «Человек идущий» фоновай хаамыы чемпионатын дипломана. Түмсүүгэ Дьокуускай куорат Гагарин уокуругар олорор, күн ахсын хаамыыны, сэрээккэни өрө туппут далбар хотуттар сылдьаллар.

Уон сыллааҕыта бу түмсүүнү тэрийбит Сардаана Ядреева:

– «Сардаҥа» түмсүү тэриллибитэ ыам ыйын 15 күнүгэр 10 сылын туолар. Ол курдук, 2014 сылга күһүн Гагаринскай уокурукка хаалыктаах хаамыыбын салҕаары, хаамар дьону көрдөөбүтүм. Билсиһэн, булсуһан баран, бастаан «Стерх» спортивнай комплекска фойеҕа хаамарга көҥүл ылбыппыт. Кыараҕас уонна муостата кафель буолан халтараан этэ. Онон халлаан сылыйдаҕына көрсөргө сүбэлэһэн баран, 2015 сылга саас хааман саҕалаан барбыппыт. 

Барыга көхтөөх, ырыаһыт, хомусчут, хоһоон айааччы дьон түмсэн, «Сардаҥа» түмсүү тэринэн, кыһыннары-сайыннары бэйэбит былаһааккабытыгар (билигин улахан поликлиника тутулла турар) сарсыарда 6 чааска көрсүһэн, эппитин-хааммытын уһугуннарар эрчиллиилэри оҥорон,  хааман, онтон сүһүөхпүтүн-иҥиирбитин ууннары тардыалыы түһэн баран дьиэбитигэр тарҕаһарбыт. Бөлөхпүт аатыгар дьүөрэлии күн сардаҥата өҥнөөх саһархай футболка, кашне уонна маҥан бейсболка булуммуппут.

Ити курдук кыһыннары-сайыннары сарсыарда ахсын көрсүһэн, билсиһэн, сыыйа солбуллубат пионербаһаатай Александра Гаврильевна, культ-маассабай сектор Альбина, кини көмөлөһөөччүлэрэ Татьяна, Ирина салайыыларынан Пионер, Хомсомуол, Кыайыы күннэрин сыллата бэлиэтиир үгэстэннибит. Кыайыы күнүгэр Валентина Афанасьевна гречка хааһынан күндүлүүрэ.

Саҥа дьылы булгуччу маскарадтаах, Тымныы Оҕонньордоох, Хаарчааналаах көрсөрбүт. Хаамар суолбутугар турар «ОптимистПроф» маҕаһыын Саҥа дьыллааҕы харыйатын таһыгар хаартыскаҕа түһэн ааһарбыт. Бу бырааһынньыктары, биллэн турар, сарсыарда 6 чааска мустан бэлиэтиирбитин бастакы сылларга ааһар массыналар соһуйа көрөллөрө. Кэлин, төттөрүтүн, сигнааллаан, эҕэрдэлээн ааһар буолбуттара. Оччолорго «Бургер Хит» диэн тэрилтэ түүннэри үлэлиир буолан, киирэн сылаас чэй, кофе иһэрбит. Дьыл сылаас кэмигэр, саас, сайын, күһүн, «Сопка любви» походтуур этибит. Ол саҕана онно улахан тутуу суох этэ. Ханан баҕарбыт сирбитинэн дуоһуйа хаамарбыт.

Кыайыы паарката тутулла турар миэстэтигэр бэс ыйын 22 күнүгэр түүн 02.30 чаастан мустан, сахалыы таҥаспытын кэтэн, хомуска оонньоон, оһуокайдаан күнү көрсөрбүт үгэскэ кубулуйбута. Бөлөхпүт хоһоонньуттара, ырыаһыттара  А. Румянцева сахалыы, Ю. Гурьева нууччалыы Өрөгөй ырыабытын айбыттара. Аны туран, хаамар былаһааккабытын сыл ахсын субуотунньуктаан ыраастыыр этибит.

Оччотооҕу хаартыскаларбытын көрө олорон, наһаа да элбэх киһи кэлэн ааспытын сөхтүм! Сорохтор тыаттан уоппускаларыгар куоракка кэлэ сылдьан кытта үөрэ-көтө хаамсан ааһаллара! Түмсүүбүт 10 сылынан эн-мин дэсиһэн бииргэ сылдьыбыт дьүөгэлэрбин, доҕотторбун А. Рожинаны, А. Готовцеваны, Т. Торговкинаны,  А. Ушницкаяны,  В. Афанасьеваны, А. Румянцеваны, Ю. Гурьеваны, Л. Александрованы, С. Васильевы, В. Заровняеваны, А. Бубякинаны, В. Малардырованы уо.д.а. итиитик-истиҥник эҕэрдэлиибин! Өрүү саныы-ахта сылдьабыт ырыа аргыстаах, элбэх саҥалаах Иринабытын, хаартыскаҕа түһэрэн группабыт историятын бэлиэтээн хаалларбыт Семен Ионовичпытын.

Бу курдук бииргэ тутуспутунан чөл-чэгиэн туруктаах хаама-сиимэ, сүүрэ-көтө, ыллыы-туойа сылдьыҥ! Барыгытын ахтабын-саныыбын! Эһигини кытары куруук бииргэбин!

Айталина Рожина, «Cардаҥа» түмсүү уопсастыбаннай инструктора:

– Телевизорынан, араадьыйанан М.И. Лыткин хаалыктаах хаамыы туһатын туһунан кэпсиирин, этэргэ дылы, эккирэтэ сылдьан истэрим да, көрөрүм даҕаны. Бу кэмҥэ Дьааҥы улууһугар Баатаҕай бөһүөлэгэр олорор этим. Аны туран Дьокуускай куоракка олорор дьүөгэм, бииргэ үөрэммит үөлээннээҕим Яна Климовская хаалыктаах хаамыынан дьарыктанан, тыаны, ойууру биир гына сылдьар хаартыскаларын көрөн олус диэн сэҥээрэр этим. Дьылҕа хаан ыйааҕынан 2018 сыллаахха куоракка көһөн кэлэргэ күһэллибитим. Кэлээт Янабын батыһан, Култуура уонна сынньалаҥ пааркатыгар хаалыктаах хаамарбын саҕалаабытым. Яна онно С.Г. Ядрееваны уонна түмсүүтүн кытта билиһиннэрбитэ. Ити курдук сыыйа сөпкө хаамарга, тыынарга, хамсаныылары оҥорорго үөрэммитим.

Мин бу түмсүүгэ киирэрбэр инструкторынан А.Г. Евсеева сылдьара. Дьарыкпыт сарсыарда 6-7 чаастан саҕаланара. Кыһыҥҥы дьыбардаах тымныыны, сайыҥҥы өҥүрүк куйааһы  аахсыбакка, күн аайы тахсан эппитин-хааммытын уһугуннаран, хааман-сиимэн дьарыктанабыт.

Биир сарсыарда буоларын курдук дьарыктана сырыттахпытына,  Зинаида Егоровна Аммосова диэн физическэй култуура уонна маассабай спорт управлениетын отделын начаалынньыга кэлэн, сэрээккэ оҥотторбута. Кэпсэтии түмүгэр инструктор наадатын туһунан эппитэ. Онтон ыла уопсастыбаннай инструкторынан ананан үлэлээбитим номнуо төрдүс  сылыгар барда. Хас сарсыарда аайы эти-сиини уһугуннаран, хааммытын хамсатар хаалыктаах хааман, иҥиирбитин имитэн, сүһүөхпүтүн сылытан,  сонуммутун ирэ-хоро кэпсэтэн, оонньоон-көрүлээн, күннээҕи турукпутун тупсаран, үөрэ-көтө алтыһабыт. Түмсүүбүт сарсыардааҥҥы сэрээккэнэн эрэ муҥурдаммат, олорор уокурукпут, куорат, спорт кэмитиэтин тэрээһиннэригэр барытыгар көхтөөх кыттыыны ылабыт.

Биир саамай улахан ситиһиибитинэн 2024 с. хаалыктаах хаамыыга Арассыыйа чемпионатыгар кыттыбыппыт буолар. 142 хамаандаттан 7-с миэстэни ылбыппыт, өрөспүүбүлүкэбитигэр бастакы миэстэ буолбуппут. Усулуобуйа быһыытынан күрэхтэһии 5 категорияҕа араарыллыбыта. Биһиги сааспытынан биэнсийэлээхтэр категорияларыгар хапсыбыппыт. Ирдэбил быһыытынан, хамаанда 10-тан итэҕэһэ суох чилиэннээх буолуохтааҕа. Онтон биир киһи ый устата күн аайы 25 тыһыынча хаамыыны оҥоруохтааҕа. Ити сүрүн ирдэбиллэри толорон (кыра атын ирдэбиллэр өссө да бааллара), Арассыыйа чемпионатыгар күрэхтэһэ киирэр буолбуппут. Дьиҥэр, 11 киһилээх хамаанда тэринэн саҕалаан баран, икки киһибит ыалдьан тохтообуттарыгар, эбии икки киһини ылбыппыт. Ол түмүгэр уопсайа 13 буолан кыттыбыппыт уонна «Лучшая команда региона» ааты сүкпүппүт. Саамай эдэрбит Лена Климовская 57 саастааҕа, саамай аҕабыт Валентина Толстоухова 75-ин туолбута. Күн аайы ким төһөнү хаампытын сурукка тиһэн испитим. Ол түмүгүнэн:

В.И. Егорова – 798719 хаамыы;

Л.С. Мягчегирова – 790165 хаамыы;

З.Г. Слепцова – 789564 хаамыы;

Е.И. Толстякова – 780511 хаамыы;

5. Л.П. Климовская – 778501 хаамыы;

6.  А.Г.  Рожина – 777193 хаамыы;

7. В.А. Толстоухова – 730742 хаамыы;

8. З.И. Егорова – 725698 хаамыы;

9. В. Заровняева – 620596 хаамыы;

10. С.Г. Ядреева – 396705 хаамыы;

11. П.В. Татаринова – 325222 хаамыы;

12. Т.Н. Торговкина – 293812 хаамыы;

13.  В.И. Дьяконова – 192155 хаамыы.

Уопсайа хамаанданан биир ыйга 7 999 583 хаамыыны оҥорбуппут. Түгэнинэн туһанан хамаандам кыргыттарыгар улахан махталбын тириэрдэбин. Бу күрэххэ хаамарбытыгар сорох үлэлиир кыргыттар куорат устун үлэбитигэр оптуобус күүтэн турбакка, сатыы сылдьарга үөрэммиппит.

Уонна, көрдөөх өттүттэн санаан аастахха, кыһын олунньу ыйга  футболлуубут, мээчикпит – сылгы хойуута. Оҕо сааһы санаан лапта да оонньуубут, кылаастаан да тэйэбит, остуол оонньуутун да оройуттан тутабыт, скакалкалаан да дайабыт. Төрөөбүт күннэри бэлиэтээн харабаай ыллаан, эҕэрдэ тыл этэн, «Туймаада нефть» заправкатыгар сылаас сакалаат иһэн, өрөбүл аайы бассейҥҥа, катокка сылдьан, кыра оҥоһуктарга маастар кылаастарга үөрэнэн, кырдьар диэни билиммэккэ күн бүгүҥҥэ диэри дьиэрэҥкэйдээн, ойон-тэбэн сүһүөхпүтүгэр сылдьарбытыттан олус диэн үөрэбин.

Тапталлаах бөлөҕүм дьонугар, саамай тулуурдаах, саамай дьоҕурдаах, саамай талааннаах, үтүө майгылаах, оҕолуу үөрүнньэҥ, истиҥ-эйэҕэс дьоммор сиргэ тиийэ сүгүрүйэбин, эһиги баар буолаҥҥыт миэхэ кынат үүннэрдигит, олохпун тупсардыгыт. Барыгытыгар барҕа махтал!