Санаа ситимэ...
Бу быыстапкаҕа сылдьан «Алтан оҥоһук» диэн өссө биир тэрилтэ кэрэ, нарын айымньыларын көрөн астынным, үөрдүм. «Күндүл» уонна «Алтан-Арт» эрэ баалларын билэрим.
Туох кистэлэй, кэнники сылларга алтаммыт көмүс тэҥэ сыаналаммыта соһутар, сөхтөрөр. Ордук алтанынан дьарыктанар тэрилтэ соҕотох эрдэҕинэ оннуга. Ырыынак сокуона диэн буоллаҕа. Иккис өттүттэн, көмүс, үрүҥ көмүс да сыаната дойду үрдүнэн сыаналанан, ювелирдарга көрүллэр чэпчэтии тохтоон, нолуоктара үрдээн, онно эбии уот-күөс, уматык-той сыаната харса суох улаатан, мантан инньэ олохтоох оҥоһуу симэхпит, киэргэлбит сыаната чэпчиир туруга суох. Онуоха, син эмиэ атын салааларга курдук, киэргэли оҥорон таһаарыы ночоото биһиэхэ киин эрэгийиэннэрдээҕэр лаппа ыарахана охсор.
Ол да буоллар, төрүт култуурабыт сорҕотун – саха симэҕин, киэргэлин үптээх-харчылаах эрэ өттө кэтэр, иилинэр кыахтанара – сиэрэ суох. Онон, көмүс ортону тутуһан, оҥорон таһаарыыны элбэтэн, симэх, киэргэл сыаната сөбүгэр буоларын хааччыйан, төһө кыалларынан кыра, орто да дохуоттаах нэһилиэнньэ киэҥ араҥата кэтэн, сахалыы оҥоһук тарҕанарын, үйэтийэрин ситиһиэх кэриҥнээхпит. Онуоха олохтоох оҥорон таһаарааччыга судаарыстыба өйөбүлэ, кырата, чэпчэтии көрөрө туһа, көдьүүс буолуо этэ. Ааҕааччы, туох дии саныыгын?
Ааптар хаартыскаҕа түһэриилэрэ, биидьийэни таҥыыта (куар-коду туһан).
Сонуннар
Ордук ааҕаллар
