Санаа быраас кинигэтэ сүрэхтэннэ

Бүгүн, атырдьах ыйын  30 күнүгэр, Н.Д.Неустроев аатынан SMART библиотекаҕа эмчит идэлээх норуот бырааһа Татьяна Назарова- Санаа быраас “Күннүкпүн арыйан көрдөххө...” кинигэтин биһирэмэ буолла. Күннэтэ долгуйа  кэтэһэр сүбэ кэпсээннэр  455 сирэйгэ тиһиллэн,  халыҥ хахтанан  улахан кинигэ буолан күн сирин көрдө. Күннээҕи олох түбүктэриттэн саҕаламмыт күннүк, барыта киһи дьылҕатын чэпчэтиигэ, туругу чөл оҥорууга туһуламмыт. Норуот бырааһа буоларын бүгүҥҥү күн туоһулаан, биһирэмҥэ 200-кэ киһи кытынна. Чахчыта да хас биирдии киһи санаатын таайар суруйуулара, быраас оҕо сааһыттан иннигэр турбут кыһалҕалары өйүнэн тобулан туорааһыныгар, уһун сыллаах үлэтигэр, дьоҥҥо үтүө санаатыгар сытар.

Санааттан санаа тиһиллибитин көрдөрөр кинигэ биһирэмэ уратытык барда. Биһирэм Татьяна Михайловна алгыс үтүө тыллары анааһыныттанүөрүүлээх чаас аана аһылынна. Күннүк бастакы сирэйэ кырачаан кыыс олоҕун кэпсээниттэн саҕаланна. Айылҕалаах быраас буолар дьылҕата таайан, оҕо сааһыттан чугас дьонун доруобуйаларын тупсарыыга дьайвылары оҥорбут эбит. Уон икки саастааҕар ийэтэ аптекаттан пиявка ылларан, давленията тахсан ыалдьар хараҕар уурдарар эбит. Эдьиий буолан улаханнык ыалдьан сытар  балтын Асиданы ыарыылыы балыыһаҕа киирсибит. Кыайан айаҕын аппат балтытыгар илдьи ыстаабыт аһын биэрэн сыыйа үтүөрдүбүт. Биир күн балтытыттан үтүөрэр баҕа санаатын ыйытан, пиногриад сиэҕин баҕатын истибит. Балтын киһи буолар баҕа санаатын толороору, сытар ыарыһахтар сорудахтарын толорорго күһэллибит. Баҕа санаа пиногриада өлүүттэн өрөһүлтэ буолуоҕуттан, баҕа санаа дьикти күүһүнэн Санаа быраас буоларга үктэл охсуллубут.

Кинигэ ааптарын Зоя Багынанова, Саха АССР, РСФСР үтүөлээх артыыската, Ульяна Винокурова, социология билимин доктора, профессор, общественнай деятель, Софья Сидорова аатынан бириэмийэ лауреата,  Дария Санникова, оҕо сааһын дьүөгэтэ, кылааһынньыссата Елизавета Потапова, Саха театрын артыыската, СӨ үтүөлээх артыыската, Маргарита Куличкина, доруобуйа бөлөҕүн салайааччыта, Саха АССР уонна РСФСР үтүөлээх учуутала, Бочуот Знагын кавалера Любовь Егорова уонна да элбэх киһи эҕэрдэлээтэ. Итиэннэ Санаа бырааска анабыл хоһооннору Наум Киренскэй, Полина Победа аахтылар. Наум Киренскэйгэ махтанан кинигэтин бэлэх уунна уонна эмтэнэргэр диэн анаан 50 тыһ. харчынан көмөлөстө. Маны таһынан Ирина Саввина салайар "Илии сылааһа" иистэнэр сыахха 50 тыһ. көмөнү  оҥордо. Ааспыт күһүн үбүнэн көмөнү эмиэ оҥорон турар. Олох түгэнин хоһооҥҥо тиһэр Полина Победа сааһыгар тэҥнэниллибэт “трюктары” толорон, биһирэм кыттыылаахтарын сөхтөрдө. Муусука үрдүкү оскуолатын үөрэнээччитэ  Сайыына скрипкаҕа оонньоон, норуот таптаан истэр ырыаһыта Мария Захарова сахалыы ырыалары ыллаан, тэрээһини ураты тыыҥҥа киллэрдилэр.  Кинигэ ааптара 0 кылаастан бииргэ үөрэммит дьүөгэлэрэ эмиэ ааспыты санатан эҕэрдэ ырыаларын толордулар.

Кинигэ биһирэмин “Күннүкпүн арыйан көрдөххө...” кинигэ редактора, сурунлыыс Лариса Аввакумова иилээн ыытта. Бу курдук баҕа санаа күүһүнэн олоҕо салыллыбыт Татьяна Назарова-Санаа быраас кинигэтин биһирэмэ олус тэрээһиннээхтик ааста.