Саллааттар хос-хос сиэннэрэ ыллыыллар

Мин эһэм хорсун буойун,

Уот сэрии биир саллаата,

Өстөөҕү өһөрө кыргыспыта,

Кыайыы күнүн аҕалбыта.

Маннык тыллардаах ырыалары кимнээх ыллыылларый?

Саргылана Андреевна Седалищева, С.А. Новгородов аатынан Чурапчы орто оскуолатын 4 «Г» кылааһын салайааччыта:

– Элбэх хос эһэ, эбэ буолан оҕолорго «Сэрии оҕолоро», «Мин эһэм», «Инники кирбииттэн сурук» курдук хоһооннор, ырыалар нөҥүө иитэр үлэни саҕалаабыппыт.

Биир дойдулаахпыт Р.И. Корякина-Хотууна хоһоонугар, Александр Дмитриев-Чүмэчи матыыбыгар «Мин эһэм» ырыанан араас таһымнаах күрэхтэргэ кыайыы өрөгөйүн билбит кылааспыт. Ол курдук, 2024-2026 сс. Норуоттар икки ардыларынааҕы «Вселенная Кындыкан», «Мы – это счастье наших предков», Арассыыйатааҕы «Полярная звезда», «Бриллиантовые нотки», «Северное сияние», Өрөспүүбүлүкэтээҕи «Улуу Кыайыыны туойабын», «Классный класс», улуустааҕы «Саһарҕа  саас сулустара» уо.д.а. таһымнаах күрэхтэргэ Кылаан чыпчаал хаһаайыттара буолбуппут.

«Мин эһэм» ырыа киһи  кутун-сүрүн тутар, долгутар күүстээх. Кылаас үгүс оҕолорун дьиэ кэргэнигэр сыһыаннаах. Ол эбэтэр бу кыракый үөрэнээччилэрим үгүстэрэ Аҕа дойду сэриитигэр Улуу Кыайыыны уһансыбыт саллааттар хос-хос сиэннэрэ, кинилэр сыдьааннара буолаллар. Оттон аҕам саастаах дьоҥҥо оҕо саастарын санатар, ахтылҕан иэйиитин уһугуннарар. Ырыаны үйэтитэн клип оҥорбуппут. Өрөспүүбүлүкэ, улуус таһымнаах араас тэрээһиннэргэ кыттыыны ылабыт.

Улуу Кыайыы 81 сылыгар аналлаах үөрүүлээх тэрээһиҥҥэ «Мин эһэм» диэн ырыаны күргүөмүнэн Чурапчы орто оскуолатын үөрэнээччилэрэ ыллаатылар.
Онон кылааһым оҕолоро ырыа  ис хоһоонун өйдөөн, ону боччумнаахтык толорон, сүгүрүйүү, махтал нөҥүө патриотизмҥа иитиллэллэр.

Манна эбэн эттэхпитинэ, Римма Корякина-Хотууна төрөөбүт дойдутугар Дьааҥыга «Мин эһэм» ырыаны оскуола үөрэнээччилэрэ бу күн эмиэ ыллаатылар.