Салгын олбохтоох суудуна элбээтэ

Өрүһүнэн туоруур сирдэр сабыллыбыттарынан сибээстээн, маннык суудуналар ахсааннара 8-тан 25-кэ диэри эбиллибитин туһунан тырааныспар министиэристибэтин пресс-сулууспата иһитиннэрдэ.

Өҥө маршрута «204-с түөлбэттэн (“Намыв” станция) – Аллараа Бэстээх (Мэҥэ Хаҥалас улууһа)» оҥоһуллар. Үлэ чааһа – сарсыарда 7:00-тэн киэһэ 19:00 чааска диэри. Суудуналар туоллулар да, айаннаан иһэллэр. Айан сыаната былырыыҥҥынан хаалан, пассажиртан 2500 солк. ылаллар.