Салайар хампаанньаны ханна үҥсэбит?

Биллэрин курдук, 2026 сыл тохсунньу 1 күнүттэн салайар хампаанньалары хонтуруоллуур боломуочуйа муниципалитеттарга бэриллибитэ. Онон куорат олохтооҕо салайар хампаанньатын итэҕэһин-быһаҕаһын куорат салалтатыгар этинэрэ өйдөнөр.

Аны туран, эмиэ аҕыйах хонуктааҕыта Дьокуускай куорат прокуратурата Дзержинскэй уул., 57, 59, 61 №№-дээх дьиэлэригэр эппиэттээх «Жилстройком» ХЭУо салайар хампаанньаны лиибинэн туһаныыга булгуччулаах страховкаҕа дуогабара суоҕун, сыччах 2016 сылтан лииптэргэ тэхиньиичэскэй бэрэбиэркэни оҥорторботоҕун, ону сэргэ лиип нэһилиэнньэҕэ куттала суох буолуутугар эппиэттээх исписэлииһэ туһааннаах квалификацията суоҕун иһин РФ КоАП 9.1.1 ыст. 2 ч. 300 тыһ. солк. кээмэйдээх административнай эппиэтинэскэ тардыбыта.

«Киин куорат» куорат олохтоохторугар салайар хампаанньа туохха эппиэтинэстээҕин уонна ону ханна үҥсүһэр наадатын быһаарар.   

Салайар хампаанньаҥ тугу гыныахтааҕын билэҕин дуо?

Дьиэ уопсай баайын-дуолун чааһыгар:

— Дьиэ сарайа, подвала, чердак, подъезд — куруук ыраас, туора дьон киирбэтин курдук хатааһыннаах, алдьаныыта-кээһэниитэ суох буолуохтаахтар;

— Подьезд иһинээҕи кирилиэс — куруук ыраас, сылаас, сырдык буолуохтаах;

— Лифт — үлэлиир, ыраас.

— Бөх тоҕор провод — күннэтэ ыраастаныллыахтаах, дезинфекция оҥоһуллуохтаах, үлэлиэхтээх.

Хомунаалынай систиэмэ:

— уу турбата, сылытар систиэмэ, канализация — барыта үлэлиэхтээх;

— электричество уотун ситимэ — подъезд щитыгар диэри эҥкилэ суох үлэлиэхтээх;

— Дьиэ анныгар, аллараа этээскэ уу тэстэрин быһаарыахтаах, туоратыахтаах.

Тиэргэн:

— Куруук хомулла, ыраастана туруохтаах, сайыҥҥы өттүгэр быылы хаптатар үлэ ыытыллыахтаах, кыһын хаар күрдьүллүөхтээх, муустан, чэҥтэн ыраастыныллыахтаах.

— Бөх тоҕор контейнер: бөҕө кэмиттин кэмигэр тиэйиллиэхтээх, былаһаакката куруук ыраас буолуохтаах;

— Көҕөрдүү: олордуу мастарга, сибэккигэ уу кутуллуохтаах, алдьаммыт мастар саҥардыллан иһиэхтээхтэр;

— Ыскамыайкалар, оҕо, спорт былаһааккалара, о.д.а. кэмиттэн кэмигэр өрөмүөннэниэхтээхтэр, кырааскалаах, ыраас буолуохтаахтар.

Кыстыкка бэлэмнэнии:

— Подъезд аана, түннүгэ тымныы үрбэт гына оҥоһуллуохтаах;

— Ититэр систиэмэ кыстыкка киириэх иннинэ бэлэм буолуохтаах;

— Сааскы, күһүҥҥү халтарааҥҥа сатыы дьон сылдьар сиригэр кумах кутуллуохтаах.

Саахалтан сэрэтэр миэрэлэр:

— Олохтоохтор бары туттар сирдэригэр турба тоҕо барарын, бүөлэнэрин, уот арахсарын туоратар суукканы эргиччи үлэлиир анал сулууспа баар буолуохтаах;

— Дьон олоҕор уонна доруобуйатыгар кутталы суоһуур түгэннэр суһаллык туоратыллыахтаахтар.

Нэһилиэнньэни кытта үлэ:

— Докумуоннары тутарга, төлөбүрдэри ыларга быһыллыбыт бириэмэ олохтонуохтаах.

— Тарыып, оҥоһуллубут үлэ, уоту, ууну араарыы былааннанарын туһунан биллэрии, информация дьон бары билиитигэр тахсыахтаах;

— Дьиэни бас билээччилэри кытта уопсай мунньахтар ыытыллыахтаахтар.

Салайар хампаанньа туохха эппиэтинэһи сүкпэтий?

— Салайар хампаанньа кыбартыыра иһинээҕи боппуруостарга эппиэтинэһи сүкпэт: смесители уларыы, турба бүөлэммитин ыраастааһын, розетка, электропроводка өрөмүөнэ.

Бу барыта — дьиэни, ол эбэтэр кыбартыыраны бас билээччи бэйэтин эппиэтинэһэ.

— Хомунаалынай өҥөлөр (уот, уу, сылаас: салайар хампаанньа уопсай дьиэ тиһиктэригэр эппиэтинэстээх, оттон өҥө хаачыстыбатыгар эппиэтинэһи өҥөнөн хааччыйар тэрилтэ сүгэр — Якутскэнерго, Водоканал уо.д.а.

Салайар хампаанньа эбээһинэһин толорбут түгэнигэр:

— Салайар хампаанньа аатыгар сурук суруллар.

— Бу көмөлөспөт, итэҕэс туоратыллыбат түгэнигэр, Госстройжилнадзор аатыгар үҥсүү түһэриллэр. Дьиэни бас билээччи маны таһынан Роспотребнадзорга уонна Прокуратураҕа суруйан, бырааба күөмчүлэммитин үҥсэр кыахтаах.

Өйдөөҥ: Төлөбүр хаачыстыбалаах өҥө иһин оҥоһуллар. Ылыммыт эбээһинэскэ ээл-дээл сыһыаны кытта эйэлэһимэҥ!

Дьокуускай куораттааҕы Муниципальнай инспекция управлениета:

Дзержинскэй уул., 21​1 этээс, үлэ күннэригэр сарсыарда 09.00 чаастан киэһэ 18.00 чааска диэри үлэлиир, эбиэккэ тохтобул: 13.00-14.00 чч.

Төл.: +7 (4112) 30‒07‒61, +7 (4112) 30‒07‒62, +7 (4112) 30‒07‒60