Салайар хампаанньалары .... салайар управление тэриллиэҕэ

Бу үлэнэн, холобура, Дьокуускай куоракка Муниципальнай инспекция управлениета диэн саҥа тэрилтэ дьарыктаныаҕа. Баһылык Евгений Григорьев Губинскай уокурук олохтоохторун кытта көрсүһүүгэ эппитинэн, саҥа тэриллэр управление анал массыынанан, таҥаһынан толору хааччыллыаҕа.

Тохсунньу саҥатыттан итини сэргэ «суһал линия» үлэлээн, куорат олохтоохторо салайар хампаанньаларыгар сыһыаннаах ыйытыылары биэриэхтэрин сөп.

Евгений Григорьев маны сэргэ нэһилиэнньэ салайар хампанньалар рейтиннэрин оҥоруохха диэн этиитин өйөөтө – ханнык хампаанньаҕа ордук элбэх үҥсүү киирбитэ, ЕДДСка сайаапка киирбитэ, о.д.а.

Санатар буоллахха, ааспыт ыйга Ил Түмэн дьокутааттара сокуоҥҥа дьоһун көннөрүүлэри ылынан, элбэх кыбартыыралаах олорор дьиэлэри салайар хампаанньалары хонтуруоллуур боломуочуйа 2026 сыл тохсунньу 1 күнүттэн муниципалитеттарга бэриллэр буолбута. Сокуон ылыллыбытын кэннэ Евгений Григорьев бэйэтин тг-ханаалыгар: «Бэрээдэги олохтуурга бары бииргэ үлэлэһиэхпит уонна салайар хампаанньалар нэһилиэнньэттэн ылар харчыларыгар оҥоруохтаах өҥөлөрүн барытын хаачыстыбалаахтык толороллорун ситиһиэхпит – подъеһы ыраастааһынтан саҕалаан оҕо былаһааккатын туругар тиийэ!» – диэн суруйан турар.

Бэлиэтээн эттэххэ, куорат дьаһалтатыгар салайар хампаанньалар үлэлэригэр сыһыаннаан элбэх үҥсүү киирэр, оттон өрөспүүбүлүкэ үрдүнэн салайар хампаанньаларга киирэр үҥсүү 72% Дьокуускай куоракка тиксэр.