Салайар хампаанньаҥ тугу гыныахтааҕын билэҕин дуо?

Санатар буоллахха, алтынньы ыйга Ил Түмэн дьокутааттара сокуоҥҥа уларытыыны киллэриини ылынан, куорат дьаһалтатыгар элбэх кыбартыыралаах олорор дьиэлэри салайар хампаанньалары хонтуруоллуур боломуочуйа бэриллибитэ.

Сокуоҥҥа уларытыыны киллэрии Дьокуускай куорат дьаһалтатын көҕүлээһининэн, Ил Түмэн дьокутаата Виктор Федоров өйөбүлүнэн ылыллан турар. Ол төрүөтүнэн өрөспүүбүлүкэ үрдүнэн салайар хампаанньаларга киирэр үҥсүү 72% Дьокуускай куоракка тиксэрэ буолбута.

Оттон салайар хампаанньа чуолаан туох үлэни ыытыахтааҕын киһи барыта билэр дуо?

Олохтоох дьаһалта олох-дьаһах, хомунаалынай хаһаайыстыба эйгэтигэр уонна энергетикаҕа эйгэтин тг-ханаала бу боппуруоска сиһилии хоруйу биэрэр.

Салайар хампаанньа тугу булгуччу оҥоруохтааҕый?

Дьиэ уопсай баайын-дуолун чааһыгар:

— Дьиэ сарайа, подвала, чердак, подъезд — куруук ыраас, туора дьон киирбэтин курдук хатааһыннаах, алдьаныыта-кээһэниитэ суох буолуохтаахтар;

— Подьезд иһинээҕи кирилиэс — куруук ыраас, сылаас, сырдык буолуохтаах;

— Лифт — үлэлиир, ыраас.

— Бөх тоҕор провод — күннэтэ ыраастаныллыахтаах, дезинфекция оҥоһуллуохтаах, үлэлиэхтээх.

Хомунаалынай систиэмэ:

— уу турбата, сылытар систиэмэ, канализация — барыта үлэлиэхтээх;

— электричество уотун ситимэ — подъезд щитыгар диэри эҥкилэ суох үлэлиэхтээх;

— Дьиэ анныгар, аллараа этээскэ уу тэстэрин быһаарыахтаах, туоратыахтаах.

Тиэргэн:

— Куруук хомулла, ыраастана туруохтаах, сайыҥҥы өттүгэр быылы хаптатар үлэ ыытыллыахтаах, кыһын хаар күрдьүллүөхтээх, муустан, чэҥтэн ыраастыныллыахтаах.

— Бөх тоҕор контейнер: бөҕө кэмиттин кэмигэр тиэйиллиэхтээх, былаһаакката куруук ыраас буолуохтаах;

— Көҕөрдүү: олордуу мастарга, сибэккигэ уу кутуллуохтаах, алдьаммыт мастар саҥардыллан иһиэхтээхтэр;

— Ыскамыайкалар, оҕо, спорт былаһааккалара, о.д.а. кэмиттэн кэмигэр өрөмүөннэниэхтээхтэр, кырааскалаах, ыраас буолуохтаахтар.

Кыстыкка бэлэмнэнии:

— Подъезд аана, түннүгэ тымныы үрбэт гына оҥоһуллуохтаах;

— Ититэр систиэмэ кыстыкка киириэх иннинэ бэлэм буолуохтаах;

— Сааскы, күһүҥҥү халтарааҥҥа сатыы дьон сылдьар сиригэр кумах кутуллуохтаах.

Саахалтан сэрэтэр миэрэлэр:

— Олохтоохтор бары туттар сирдэригэр турба тоҕо барарын, бүөлэнэрин, уот арахсарын туоратар суукканы эргиччи үлэлиир анал сулууспа баар буолуохтаах;

— Дьон олоҕор уонна доруобуйатыгар кутталы суоһуур түгэннэр суһаллык туоратыллыахтаахтар.

Нэһилиэнньэни кытта үлэ:

— Докумуоннары тутарга, төлөбүрдэри ыларга быһыллыбыт бириэмэ олохтонуохтаах.

— Тарыып, оҥоһуллубут үлэ, уоту, ууну араарыы былааннанарын туһунан биллэрии, информация дьон бары билиитигэр тахсыахтаах;

— Дьиэни бас билээччилэри кытта уопсай мунньахтар ыытыллыахтаахтар.

Салайар хампаанньа туохха эппиэтинэһи сүкпэтий?

— Салайар хампаанньа кыбартыыра иһинээҕи боппуруостарга эппиэтинэһи сүкпэт: смесители уларыы, турба бүөлэммитин ыраастааһын, розетка, электропроводка өрөмүөнэ.

Бу барыта — дьиэни, ол эбэтэр кыбартыыраны бас билээччи бэйэтин эппиэтинэһэ.

— Хомунаалынай өҥөлөр (уот, уу, сылаас: салайар хампаанньа уопсай дьиэ тиһиктэригэр эппиэтинэстээх, оттон өҥө хаачыстыбатыгар эппиэтинэһи өҥөнөн хааччыйар тэрилтэ сүгэр — Якутскэнерго, Водоканал уо.д.а.

Салайар хампаанньа эбээһинэһин толорбут түгэнигэр:

— Салайар хампаанньа аатыгар сурук суруллар.

— Бу көмөлөспөт, итэҕэс туоратыллыбат түгэнигэр, Госстройжилнадзор аатыгар үҥсүү түһэриллэр. Дьиэни бас билээччи маны таһынан Роспотребнадзорга уонна Прокуратураҕа суруйан, бырааба күөмчүлэммитин үҥсэр кыахтаах.

Өйдөөҥ: Төлөбүр хаачыстыбалаах өҥө иһин оҥоһуллар. Ылыммыт эбээһинэскэ ээл-дээл сыһыаны кытта эйэлэһимэҥ!