«Сахатранснефтегаз» сууккаҕа билигин 31 т тиийэ убаҕас гааһы атыыга таһаарар

Бу туһунан Бырамыысыланнас уонна геология министиэристибэтин департаменын салайааччы солбуйааччыта Михаил Винокуров иһитиннэрдэ. «Сахатранснефтегаз» уонна ЯТЭК хас күн аайы убатыллыбыт углеводород гааһын оҥорон таһаарыыны үрдэтэллэр. Ол курдук, ЯТЭК хайыы үйэ сууккаҕа 70 туоннаны бэлэмниир буолбут. Салгыы маннык баран истэхтэринэ гаас-мотуор уматык тиийбэт кыһалҕата тохтуо. Салайааччы эппитинэн, бэнидиэнньиктэн саҕалаан, 7 чааһынай  АГЗС үлэлээн, гааһы куттууга уочарат сыыйа аҕыйаан эрэр.

Балаҕан ыйын 15 күнүнээҕи туругунан Дьокуускай куоракка 11 завправка ыстаансыйата үлэлии турар. Ол иһигэр «Сахатранснефтегаз» тэрилтэ тутаах суолталаах түөрт эбийиэгэ баар.

Эрдэ иһитиннэрбиппит курдук, уһун-киэҥ уочарат уонна гааһы куттааччыларга ордук табыгастаах буоллун диэн, гаас заправкалара анал кыраапыгынан үлэлииллэр. Икки ыстаансыйа суукканы эргийи үлэлиир.

Убатыллыбыт гааһы ханна уонна ханнык кэмҥэ куттуохха сөбүй?

*Жатайга онна Можайскай уулуссатыгар баар  АГЗС-тарга сарсыарда 8:00 ч саҕалаан, киэһэ 20:00 ч диэри үлэлиир.

*Михаил Николаев бэрэспиэгэр уонна  Бүлүүлүүр суолга баар ПАГЗС-тар суукканы эргиччи үлэлииллэр. Арай сарсыарда  07:30 ––  08:00  уонна киэһэ 19:30 – 20:00 ч диэри техническэй тохтобул баар.

*Уопсастыбаннай тырааныспардарга анал бириэмэ анаммыт.

Итини таһынан куоракка үс ыстаансыйа тимир көлөлөрү метанынан хааччыйар: Строительнай ырыынак таһынааҕы «Саханефтегазсбыт» ыстаансыйатыгар, ону сэргэ Новопортовской уонна ДСК оройуоннарыгар түстэммит «СахаМетан» ыстаансыйаларыгар.

Метанынан уонна убатыллыбыт углеводороднай гааһынан барар тимир көлөлөөхтөр уочаракка түбэспэт гына, «Сахатранснефтегаза» АГЗС-тарга уочат хайдаҕын туһааннаах тэрилтэ официальнай  саайтыгар уонна анал сыһыарыытыгар баар «Мониторинг» баһы киирэн көрүөххүтүн сөбүн санатабыт. “Иһитиннэрии субу бириэмэтээҕи дааннайы көрдөрөрө” этиллэр.