Сахалыы таҥастаах марафон чемпионат бэлиэ түһүмэҕэ буолуоҕа

Аны биир ыйынан, атырдьах ыйын бүтэһик күнүгэр, киин куорат эмиэ спорт түһүлгэтигэр кубулуйаары турар. Ол эбэтэр атырдьах ыйын 30 күнүгэр Дьокуускайга 100 км сүүрүүгэ Арассыыйа уонна СӨ чемпионата ыытыллыаҕа. Тэрээһин биир бэлиэ түгэнинэн Олоҥхо марафона буолуоҕа. 
Тэрийээччилэр бэлиэтииллэринэн, чемпионат идэтийбит спортсменнары уонна сүүрүүнү таптааччылары биир сорукка түмэр үрдүк таһымнаах тэрээһин буолуоҕа.
Күрэхтэһии биир бэлиэ түгэнинэн Олоҥхо марафона диэн спорду уонна норуот өбүгэттэн илдьэ кэлбит култууратын сомоҕолуур түһүмэх буолуоҕа. Ол курдук, бу түһүмэх хас биирдии кыттыылааҕа олоҥхо бухатыырын курдук бэйэтин суолун моһоллорун бэйэтэ туоруоҕа. 
Чэпчэки атлетикаҕа норуоттар икки ардыларынааҕы спорт маастара, СӨ сүүрүүгэ сүүмэрдэммит хамаандатын сүрүн тренерэ Василий Спиридонов бэлиэтээбитинэн, тэрээһин сүүрүүнэн дьарыктанар спортсменнарга эрэ буолбакка, сүүрүүнү таптааччыларга барыларыгар дьоһун суолталаах. 
Сүүрүү түөрт дистанцияҕа ыытыллар: 4 км, 8 км, 21,1 км уонна 42,2 км. Маны таһынан 4 км сахалыы таҥастаах сүүрүүгэ анал дистанция баар. 
Күрэхтэһии атырдьах ыйын 30 күнүгэр СӨ спорка министиэристибэтин уонна Дьокуускай куорат дьаһалтатын өйөбүллэринэн ыытыллыаҕа, диэн киин куорат Олохтоох дьаһалтатын пресс-сулууспата иһитиннэрэр.