Сахалыы саҥарарга үөрэтэр куурустары күүһүрдүөхтэрэ

Төрөөбүт тыл уонна сурук-бичик күнүн чэрчитинэн "Саха тыла 400" уопсастыбаннай хамсааһын Дьокуускай куорат Олохтоох дьаһалтатын өйөбүлүнэн саха тылын үөрэтии, чинчийии, дьоҥҥо тириэрдии тула төгүрүк остуолу ыытта.

Төгүрүк остуол үлэтигэр Олохтоох былаас, дьокутааттар,  уопсастыбанньыктар, тустаах тэрилтэлэр, учууталлар, учуонайдар кыттыыны ыллылар. Тэрээһини "Саха тыла 400" уопсастыбаннай хамсааһын төрүттээччитэ суруналыыс Яна Угарова иилээн-саҕалаан ыытта.

Дьокуускай куорат баһылыгын солбуйааччы Владимир Аржаков сахалыы саҥарыан, кэпсэтиэн, тылы үөрэтиэн баҕалаах дьону өйөөһүн куруук баарын, ол иһигэр Дьокуускай куоракка нууччалыы эйгэлээх дьон ортотугар төрөөбүт тылларынан кэпсэтиэн баҕалаах кэлиҥҥи сылларга биллэ элбээбитин бэлиэтээтэ. Онон кинилэргэ босхо үөрэтэр куурустары элбэтэр, методикатын күүһүрдэр уолдьаспытын уонна бастакы хардыылар номнуо оҥоһуллубуттарын туһунан этилиннэ. Бу хайысха чэрчитинэн "Саха тыла 400" уопсастыбаннай тэрилтэ уонна Национальнай библиотека уопуттарын иһитиннэрдилэр. Тыл билимин дуоктардара Римма Романовна Жиркова уонна Наталья Иннокентьевна Иванова бу кыһалҕа 90-с сыллартан күн бүгүҥҥэ диэри сытыытык турарын, Гуманитарнай чинчийэр институт кэнники сылларга ыыппыт үлэтин билиһиннэрдилэр.

Төгүрүк остуол түмүгүнэн саха тылын үөрэтиэн, төрөөбүт тылларынан саҥарыан баҕалаах дьоҥҥо босхо анал куурустары элбэтэр уонна күүһүрдэр туһунан түмүккэ кэллилэр.