Сахалыы саҥарар АйУол — AiUol өйдөөх колонка айылынна!

Оҥоһуу өй көмөтүнэн тыл платформаларын оҥорон таһаарааччы Николай Апросимов «Барҕарыы» национальнай пуонда сакааһынан, «Арктик Капитал» хампаанньа (төрүттээччи уонна генеральнай дириэктэр Матвей Евсеев) үбүлээһининэн саха тылын билэр АйУол – AiUol өйдөөх колонканы айан таһаарда.

Өйдөөх тэрил 2025 сыл сэтинньи 25 күнүгэр аан бастакытын сахалыы саҥарда. Бу икки сыллаах сыра-сылба үтүө түмүгэ буолла. Манан үлэ бүппэт, тыл куорпуһун толоруу салҕанар. Туттуллан истэҕин аайы үөрэнэн, сайдан иһиэҕэ.

Колонка саха балаҕанын курдук быһыылаах. Билигин АйУол сахалыы холкутук саҥарар, ыйытыыларга хоруйдуур. Оҥорон таһаарааччылар иһитиннэрбиттэринэн, өйдөөх тэрил интэриниэккэ холбоммокко даҕаны үлэлиир кыахтаах, онно сөптөөх бырагырааманан хааччыллыбыт.

Дьиҥэр, бастаан бырайыак аата АйКУО диэн эбит, ол эрээри тэхиньиичэскэй төрүөтүнэн АйУол оҥорорго күһэллибиттэр.

Сахалыы саҥарар өйдөөх колонканы айан таһаарыыга үлэлэспит дьон бу бырайыак ийэ тыл тыыннаах хааларыгар төһүү күүс буолуо диэн эрэнэллэр. Бу тэрил дьиэҕэ, үлэҕэ төрөөбүт тыл эйгэтин тэрийэргэ көмөлөһүөхтээх.

Хаартыска: куйаар ситимиттэн