Сахалары сөҕө көрөллөр

Дьокуускай Хатаһыттан Нина Софронова Арассыыйа Кубогар – иккис миэстэ, Арассыыйа чемпионатыгар боруонса мэтээл хаһаайката буолан билигин дойдутугар айаннаан иһэр. Онон бөдөҥ күрэхтэһиилэр призердарын кытта куйаар ситимин нөҥүө спорка хайдах кэлбитин ыйыталастыбыт.

– Ох саа көрүҥүн биир кыыс статуһугар көрөн, куруук ымсыырар этим. 2024 сыл алтынньытыгар оскуолаҕа бииргэ үөрэммит уолум Георгий Новгородов: “Выпустар күрэхтэригэр оҕунан ытыыга хамаандаҕа кыыспыт тиийбэт, дабаай, кэл, охто ылын", – диэбитигэр, сонно-тута сөбүлэспитим. Инньэ гынан ахсынньы ыйга бастакы күрэхпэр Төхтүргэ тиийэн, хамаанданан 2-с миэстэни ылбыппыт бэйэбэр эрэли үөскэппитэ.

– Бастакы күрэхтэһииттэн ситиһии диэн саныахха астык! Оннук эмиэ буолар дуо?

– Оххо бастакы хардыыларбар Максим Васильевич Кудрин сүбэ-ама буолбута. Төлөпүөн нөҥүө видео устан ыыттахпына, сыыһабын-халтыбын ыйан, сүбэлээн биэрэрэ. Бастакы охпун эмиэ киниттэн атыыласпытым. Онон бастакы учууталбынан кинини билинэбин.

– Улахан таһымнаах күрэхтэһии тыына хайдах эбитий?

– Сахалартан олус диэн саллаллар эбит. Күүстээх ытааччыны бэлиэтии көрөн, үөрэтэллэр, ыйыталлар. Кубок уонна Чемпионат кыһыл көмүс медалиһа Москубаттан сылдьар Алена Цедилина нэдиэлэҕэ 7 күн алталыы чаас дьарыктанар үһү диэни истэн, сөҕө санаатым. Оннук ээ, туохха барытыгар дьарык быһаарар оруоллаах. Биһиги хамаандабыт салайааччыта Александр Наумов бэйэтэ бириис туруоран, ситимнээх үлэни ыытан, маннык ситиһии кэллэ дии саныыбын. Кэнники икки сылга бу спорка олус элбэх кэлбитэ, оннооҕор маастардар, хандьыдааттар элбээн эрэллэрэ спорт бу көрүҥэ инникилээҕин туоһута буолар.

– Нина, кэпсээҥҥэр махтал!