Сахалар... африканецтары сахалыы саҥарда сылдьаллар

– Көмүс хостуур тэрилтэҕэ үлэлиибит. Сахалар хаһыабыт даҕаны. Икки ый үлэлиигин, икки ый сынньанаҕын, – диир автомеханик идэлээх Иван Александров.
Ити учаастакка уолаттар иккиэ эбиттэр. Иван Мэҥэ Хаҥалас Харатыттан төрүттээх буоллаҕына, бульдозерист Александр Семенов Нуораҕанаттан сылдьар. Уолаттар "ананастан хал буоллубут эрээри, маннааҕы олус сочнай буолар эбит" дэһэллэр. Папайя, манго диэн саха санаабатах фрукталарынан аһылыктаналлар. Эт чааһыгар сүрүннээн буйвол этэ эбит, ынах этиттэн уратыта суоҕун этэллэр.

– Үлэбит остолобуойугар аһыыбыт. Нуучча куухуната. Миин, торуой, салаат, хомпуот диэбит курдук. Чэппиэргэ, сэбиэскэй кэмҥэ курдук, балык күнэ. Нуучча исписэлииһэ элбэх. Ян Цедрик диэн педиатр идэлээх уол тиэхиньикэҕэ да дэгиттэринэн барыбытын сөхтөрөр. Механик үлэтэ хамнастаах диэн, онно үлэлии сылдьар, – диир Иван.

Саха сириттэн ЦАР (Центральная Африканская Республика) үлэлии тиийбит Иван, биллэн турар, Африка кини төрөөбүт дойдутуттан уратыларын тэҥнии көрөрө саарбаҕа суох.

– Олохторо ыарахан эбит. Баайдара аһара баайдар. Дьадаҥылар аһара дьадаҥылар. Оҕолор кыра эрдэхтэриттэн кэлээскэнэн уу, мас таһан харчылаһа, тугу барытын атыылыы сатыыллар. Соломо сарайдаах буор, кирпииччэ дьиэҕэ олороллор. Биһигиттэн олох атын менталитеттаахтар. Айылҕалара куйаас буолан даҕаны, күннээҕинэн олороллор. Бүгүн-сарсын аһыыр астаах буоллуҥ да үчүгэй диэбит курдук. Холодильник, морозильник диэн үксүлэригэр суох. Уоту бириэмэнэн биэрэллэр. Ол иһин ас буорту буолар. Оттон биһиги, сахалар, айылҕабыт эрэйэн даҕаны, сааскыттан саҕалаан кэлэр кыһыммытыгар бэлэмнэнэн барабыт, ол аата инникини көрөбүт. Онон уратылаахпыт дии санаатым.

Маннык сылдьарбар кэргэммэр, дьоммор, чугас доҕотторбор уонна автоэлектрикэҕэ уһуйбут убайбар, Амматтан төрүттээх, Ньурбаҕа олорбут Василий Михайлович Григорьевка махталбын тиэрдэбин. Убайым «Анаабыр алмаастарын” тутаах үлэһитэ этэ. Хомойуох иһин, былырыын кыһын күн сириттэн күрэммитэ.

Ивантан «Африкалары бэркэ сахалыы саҥарда сылдьаҕын» диэбиппитигэр, күлэр, төһө да ыарахан олохтоохторун иһин кыраттан да үөрэр, олус элэккэй норуотунан ааҕар.

Дьэ уонна сахалары биир интэриэһиргэтэр түгэн: Саха сиригэр да  вахта элбэх дии!

Иван бу иннинэ «Анаабыр алмаастарын» нөҥүө вахтаҕа үлэлии сылдьыбыт. Онон эдэр киһи сири-дойдуну билиэн-көрүөн баҕата ханна барыай?!