«Саха тыйаатырын хаарыан хампа кытыллара: Өлүөнэттэн – Волгаҕа»

«Большие гастроли» федеральнай бырагыраама чэрчитинэн ыытыллар гастроллар Йошкар-Олаҕа (Марий Эл), Чебоксарга (Чувашия) уонна Буинскайга (Татарстан) -- үс куораты хабан ыытыллыахтара.  

Арассыыйа култууратын бөҕөргөтөр, норуоттар ураты майгыларын көрдөрөр сыаллаах бу бырайыак Поволжье көрөөччүлэрин Саха театральнай искусствотын кытта билиһиннэриэ.

Гостуруол бырагырааматыгар Саха тыйаатырын репертуарыттан үс ураты буочардаах, көрүүлээх режиссер туруоруутугар аан дойду классиката, нуучча литературатын биллиилээх айымньыта уонна саха норуотун историятын, култууратын көрдөрөр испэктээктэр киирдилэр.

Арассыыйа норуодунай артыыһа, Саха тыйаатырын уус-уран салайааччыта, биллиилээх режиссер Андрей Борисов туруоруутугар Улуу Шекспир өлбөт-сүппэт айымньыта, Арассыыйа судаарыстыбаннай бириэмийэтинэн наҕараадаламмыт уонна «Кыһыл көмүс мааска» Арассыыйа тыйаатырдарын национальнай бириэмийэтинэн наҕараадаламмыт «Илиир Хоруол» испэктээк гостуруолу арыйыаҕа.    

СӨ искусстволарын үтүөлээх диэйэтэлэ, киэҥник биллэр режиссер Сергей Потапов туруоруутугар Михаил Булгаков «Маастар уонна Маргарита» испэктээк көстүөҕэ. Саха режиссерун көрүүтүнэн нуучча классикатын сахалыы ааҕыы уратытын көрдөрүө.

СӨ искусстволарын үтүөлээх диэйэтэлэ, Саха тыйаатырын сүрүн режиссера Руслан Тараховскай туруоруутугар саха норуодунай суруйааччытын Василий Яковлев-Далан арамааныттан «Тулаайах оҕо» испэктээккэ кыргыс үйэтин кэмигэр ил-эйэ, сомоҕолоһуу эрэ норуокка тыыннаах хаалар эркээйилээх суолун тэлбитин көрдөрүө.

«Саха тыйаатырын хаарыан хампа кытыллара: Өлүөнэттэн Волгаҕа диэри» гостуруоллар Арассыыйа култууратын олоҕор ураты көстүү буолуоҕа, регионнар икки ардыларынааҕы айымньылаах сибээһи бөҕөргөтүө, саҥа бырайыахтарга саҥа саҕахтары арыйыа, доҕордоһуу уонна бырааттыы култууралар кэпсэтиилэрин чаҕылхай холобура буолуо диэн эрэнэбит.