Саха түмэлигэр ураты быыстапка турда

Саха АССР оскуолаларын 1985 сыллааҕы выпускниктара быйыл оскуоланы бүтэрбиттэрэ 40 сылын туолар.

Кыайыы 40 үбүлүөйдээх сылыгар Саха сирин оскуолаларын бүтэрбит  тыһыынчанан оҕо бүгүн бэйэлэрэ олохторун орто омурҕанын ааһан, үүнэр көлүөнэни, эдэр ыччаты дойдуга тулхадыйбат таптал, бэриниилээх буолуу тыыныгар үлэлэһэр ытыктанар дьон. Кинилэр бу үтүө дьулуурдара атыттарга холобур эрэ буолар аналлаах.

"2019 сылга биһиги "Саха АССР оскуолаларын 1985 сылга бүтэрбиттэр түмсүүлэрэ" диэн уопсастыбаннай тэрилтэ   тэринэммит, быйыл бэлиэтэнэр Улуу Кыайыы 80 сылын көрсө кыайыылаахтар көлүөнэлэрин үйэтитиигэ бэйэбит кылааппытынан кыттыһабыт. Ол курдук, бүгүн, олунньу 7 күнүгэр,  Ем. Ярославскай аатынан Саха музейыгар Арассыыйаҕа биллэриллибит Аҕа дойдуну араҥаччылааччы, Саха Өрөспүүбүлүкэтигэр буола турар Ийэ дойдуну көмүскээччи сылларынан уонна Улуу Кыайыы 80 сылынан ,,Память и Время,, диэн олус баай матырыйааллаах, дириҥ ис хоһоонноох быыстапка арылынна. Тэрээһини көҕүлээччилэринэн уонна тэрийээччилэринэн Лилиана Антонова, Маргарита Акимова  буоллулар. Түгэнинэн туһанан бөлөхтөр өрөспүүбүлүкэ араас улуустарыгар олорон, бэйэлэрин кылааттарын киллэрэ олорор үөлээннээхтэрбитигэр барыларыгар махтал!!!

Бүгүн арыллыбыт "Время и Память" быыстапкабытыгар  көҥүл, эйэлээх олохпутун көмүскээн , сэрии хонуутугар эдэркээн тыыннарын биэрбит уонна этэҥҥэ эргиллэн кэлбит, уйгулаах олох тупсарыгар кыттыбыт чугас дьоммут өлбөөдүйбэт мөссүөннэрин, бойобуой мэтээллэрин, туоһу  суруктарын, наҕараадаларын, ахтыыларын, тутта сылдьыбыт малларын көрүөххэ сөп.  Ону таһынан бүгүҥҥү күммүтүгэр буола турар анал байыаннай дьайыыга волонтер, военкор, байыаннай быраас быһыытынан сылдьар үөлээннээхтэрбит, сэрии хонуутугар охтубут эдэркээн оҕолорбут тустарынан матырыйаалларбыт турдулар.
Кинилэр ааттарынан киэн туттабыт!" - диэн кэпсиир "Выпуск-85" өрөспүүбүлүкэтээҕи түмсүү бэрэссэдээтэлэ Алексей Васильев.

Быыстапка саалатыгар бииртэн биир история .... Киһи олоҕо..... 
Бу биһиги  үөлээннээхтэрбит хаан уруу дьонноро.... Кимиэхэ эрэ аҕата, эһээтэ, ийэтэ, эбээтэ..... 
Уонна билиҥҥи КЭМ.
Быыстапка олунньу 7 күнүттэн кулун тутар 2 күнүгэр диэри үлэлиир.