Саха сирин ыраах сытар оройуоннарыгар 100 бырааһы уонна биэлсэри ыытыахтара

СӨ доруобуйа харыстабылын министиэристибэтэ “Земскэй быраас” уонна “Земскэй биэлсэр” бырагыраамалар түмүктэрин таһаарда. Судаарыстыба өйөбүлэ 2012 сылтан өрөспүүбүлүкэ нэһилиэктэрин уонна ыраах сытар сирдэрин 1668 анал исписэлииһинэн хааччыйар кыаҕы биэрдэ. Быйылгы сылга 100 мэдиссиинэ үлэһитигэр, ол иһигэр 79 бырааска уонна 21 биэлсэргэ, дуогабар түһэрэргэ былаанныыллар.

Министиэристибэ каадырга сулууспатын управлениета иһитиннэрбитинэн, ааспыт сылга бырагыраамалар 100% туолбуттар, тыа сирин балыыһаларыгар 111 исписэлиис, ол иһигэр 71 быраас уонна 40 биэлсэр үлэҕэ ыытыллыбыттар.

“Земскэй быраас” уонна “Земскэй биэлсэр” бырагыраамалар “Уһун уонна көхтөөх олох” национальнай бырайыак чэрчитинэн олоххо киирэллэр. Маныаха тыа сиригэр көһөн барар исписэлиистэргэ биир кэмнээх компенсация төлөнөр. Нэһилиэктэргэ уонна куорат тииптээх нэһилиэнньэлээх пууннарга көһөр быраастарга биир кэмнээх компенсация төлөбүрэ 2 мөл. солк, оттон биэлсэрдэргэ 1 мөл. солк. Өссө 50 тыһыынчаҕа диэри нэһилиэнньэлээх куораттарга көһөр быраастарга 1 мөл. солк. уонна биэлсэрдэргэ 500 тыһ. солк. көрүллэр.