Саха сирин суолларынан таһаҕас тиэйэр массыыналар айанныыллара бобулунна

Сорох улуустарга хааччахтааһыннар от ыйыгар диэри үлэлиэхтэрэ.

Ыам ыйын 21 күнүттэн бэс ыйын 19 күнүгэр диэри ыарахан уйуктаах массыыналарга хааччахтааһыннар киирдилэр, кинилэр айанныыллара быстах кэмҥэ бобулунна. Арктика оройуоннарыгар миэрэлэр ыам ыйын 15 күнүттэн бэс ыйын 15 күнүгэр диэри, сорох суолларга 2026 сыл бэс ыйын 15 күнүттэн от ыйын 15 күнүгэр диэри үлэлииллэр. Маныаха көҥүллэммит ыйааһын муҥутуур кээмэйэ чопчуламмат. Бу туһунан ыам ыйын 13 күнүгэр өрөспүүбүлүкэ тырааныспарка уонна суол хаһаайыстыбатыгар министиэристибэтин MАХ ханаалыгар иһитиннэрдилэр.

Биэдэмистибэҕэ бэлиэтээбиттэринэн, саас сир ириитэ күүскэ барар уонна суол уйан буолар, буор сиигирэр уонна улахан ыйааһынтан суол алдьанар. Кэһээччилэри тутар туһуттан суолларга ыйааһыны хонтуруоллуур көһөрүллэ сылдьар постар туруоруллуохтара.

Дьону тиэйэр оптуобустар, аһы-үөлү, кыыллары, эми-тому, сиэмэни, уоҕурдуулары, почта тиэйэр эрэ тиэхиньикэлэр айанныахтарын сөп. Ону тэҥэ айылҕа алдьархайын туоратыыга үлэлэһэр, тутуу уонна суол тиэхиньикэтэ уонна федеральнай толорор былаас уорганнарын массыыналара сылдьаллара көҥүллэнэр.