Саха сирин сайаапкатын ылыммыттар

Казначейство инфраструктураҕа биэрэр инвестициялаах кирэдьиитигэр (мантан салгыы — КИК) сайаапка түһэрбит кэккэ эрэгийиэннэргэ сөбүлэҥ бэриллибит.

Ол иһигэр соторутааҕыта уопсайа 19,8 млрд солк. суумалаах кирэдьиити туруорсубут Нижегородскай уобалас, Ямал- Ненец автономнай уокурук, Карелия уонна Саха сирин сайаапкатын ылыммыттар. Үбүлэниини туруорсар эбийиэктэргэ спорт, туризм, суол бырайыактара, ону тэҥэ хомунаалынай өҥөҕө сыһыаннаахтар бааллар.
Казначейство инфраструктураҕа биэрэр кирэдьиитин бырагырааматын РФ Тутууга министиэристибэтэ сүрүннүүр. Территориялары сайыннарыы пуондата үлэлэһэр. 
Билиҥҥи туругунан, 82 эрэгийиэҥҥэ барыта холбоон 353,63 млрд солк. үбүлээһин көрүллэрэ быһаарыллыбыт. Ити үп ДьУОХХ сайыннарыыга, суол, тырааныспар, социальнай, туристическай инфраструктураны тупсарыыга сүрүннээн тутталлар эбит. 
Холобур, Нижегородскай уобалас хомунаалынай инфраструктураны сайыннарыыга 6.4 млрд солк. көрдөөбүт. Кэлэр үбүнэн уу ситимин, канализация коллекторын тупсараллар, 4 хочуолунай тутталлар эбит.   Ямаллар хайа хайыһарын трассатын оҥорууга, подъемниктары таҥыыга көрдөөбүттэр. 
Оттон Саха сирэ КИК биэрэр 10,18 млрд солк. үбү Өлүөнэни туоруур күргэни тутууга, Дьокуускайга «Спортивнай» саҥа түөлбэ хомунаалынай ситими тардыыга көрдөөбүт.
Карелия спортивнай стадиону тупсаран оҥорууга уонна ууну ыраастыыр тутууга хапытаалынай өрөмүөнү ыытарга суоттанар.
КИК үбэ — судаарыстыба атын таһым бүддьүөккэ эбэтэр юридическай сирэйгэ туһунан усулуобуйаҕа биэрэр өйөбүлэ диэн ааттанар. Ол да буоллар, иэс иэс курдук, итинник үп булгуччу төннөрүллүөхтээх. Ол оннугар чэпчэтиилээх бырыһыаҥҥа (3%) бэриллэр. Ким кыахтаах эрдэлээн төлөһөрө хаарчахтаммат. 
Казначейство инвестициялаах кирэдьиитэ «Олох инфраструктурата» курдук национальнай бырайыактар чэрчилэринэн инфраструктура бырайыактарыгар уһун, холобур, 15 сыл төлөһөргө кэпсэтэн, кыра бырыһыаҥҥа бэриллэр.