Саха сирин өрүстэрэ. Интэриэһинэй чахчылар

Саха сирин үрдүнэн 700 тыһыынчаттан тахса үрэх уонна үрүйэ баар, кинилэр уопсай уһуннара 2 мөл. км тэҥнэһэр.

Саамай сүрүн уу тымыра – Өлүөнэ өрүс. Кини уһуна 4400 км кэриҥэ, уутун сабардамынан аан дойду саамай элбэх уулаах өрүстэригэр киирсэр.

 Сыл улахан аҥаарыгар Саха сирин өрүстэрэ уонна үрэхтэрэ дөйө тоҥоллор. Кыра үрэхтэр уонна үрүйэлэр түгэхтэригэр диэри муус буола тоҥоллоро биллэр.

Өлүөнэ өрүс тардыыта Миссисипи иэниттэн улахан, тыһыынчанан боротуохалартан уонна арыылартан турар.

Саас үрэхтэр тиллэллэр, сүүнэ күүстээх көмүөл мууһа айанныыр. Өлүөнэҕэ, Халымаҕа уонна да атын бөдөҥ өрүстэргэ муус үгүстүк харар. Үрэхтэр сүрүннээн соҕурууттан хоту устар буоланнар, Саха сирин соҕуруу өрүстэрэ муустара эрдэ барар. Ол уу мустан, киһиэхэ кутталлаах халааннар халыйаллар.

Саха сирэ киэҥ нэлэмэн сиринэн тайаан сытарынан эрэ буолбакка, ып-ыраас айылҕатынан аатырар. Индигирка, Дьааҥы үөһээ тардыыларыгар икки атахтаах үктэммэтэх кэрэ сирдэрэ бааллар – баларга уулара ып-ыраас, дьэҥкир, тута баһан ылан иһиэххэ сөп.