Саха сирин олохтоохторо уоппускаларын ханна атаарар эбиттэрий?

“Хата, кинилэр билэллэр”, – диэххэ сөп эбитэ дуу? SuperJob диэн үлэ миэстэтин уонна үлэһити, каадыры көрдөөччүгэ көмөлөһөр дойду таһымнаах сиэрбис баар. HR эйгэтигэр технологическай лиидэр диэх курдук, оттон үлэлэрэ да буоллаҕа, араас ыйытыктары толкуйдаан, эрэгийиэннэр, ол иһигэр Саха сирин олохтоохторун кытыарбыттара эрэ баар буолар. Бу сырыыга сайыҥҥы уоппуска тиэмэтин таарыйбыттар. Чуолаан үлэлээх дьону кытыннарбыттар.

Ыйытык түмүгүнэн, Саха сирин үлэлээн иитиллээччилэрин 61% бу сайын уоппускаларын былаанныыра көстүбүт. Кинилэртэн 18% уоппускатын дьиэтигэр атаарарын эппит. 13% – даачаҕа эбэтэр дэриэбинэҕэ сынньанарга суоттанар. Дьэ, оттон 26% уоппускатын Арассыыйаҕа барарын былаанныыр. Уоппускаланааччы 4% тас дойдуга тахсаары кынатын куурдар.

Чэ, ити өйдөнөр. Ону тэҥэ өссө маннык тойоннооһуннары оҥорбуттара интэриэһиргэтэр. Холобур, дьахталлар, эр дьоҥҥо холоотоххо, дойду иһигэр айаны талаллар. Күүстээх аҥаардар үгүс өттүгэр уоппускаларын сайын ыла сатаабаттар. Улахан дьоҥҥо холоотоххо, зумердар сайынын уоппуската суох хаалаллар.

Даачаҕа сынньалаҥы уонна дойду устунан айаны ордук кыайа-хото 35-тэн аҕа саастаахтар талаллар эбит. Оттон кыраныысса тас өттүгэр сынньалаҥы – төттөрүтүн, 35-тэригэр диэри саастаахтар.

Өссө биир маннык чахчы бэлиэтэммит. Ыйытыкка кыттыбыт сайынын уоппуската суох хаалар дьон ортотугар үрдүк үөрэхтээх куорат олохтоорунааҕар орто анал үөрэхтээх исписэлиис элбэх үһү. Үрдүк үөрэх кыһатын бүтэрбиттэр дойду иһигэр сынньалаҥы ордук көхтөөхтүк былаанныыллар диэн түмүктээбиттэр.

Салгыы ыйытыкка хапсыбыттартан дохуоттарын кытта ыйыталаспыттар эбит. Инньэ гынан, ыйдааҕы хамнастара 100 тыһыынчаттан 150 тыһыынча солкуобайга диэри халбаҥныыр респонденнар, ити кээмэйтэн үгүөрү уонна кыра хамнастаах дьоҥҥо тэҥнээтэххэ, баһыйар үгүстэрэ сайынын уоппускаланаллар. Ону ааһан, хас онус уоппускаланааччы кыраныысса тас өттүгэр сынньанарын ордорор эбит.

Бээ, тохтооҥ, дьонуҥ ыйытыктара итинэн эрэ түмүктэммэтэх. Сынньалаҥҥа барааччылар кирэдьиит үбүн төһө туһаналларыгар кытта болҕомто ууруллубут.  
Быйыл сайын уоппуска ылан айанныы барааччылар 4% сынньанарга анаан кирэдьиит ылбыт эбэтэр ыларга суоттанар эбит. Оттон дойду тас өттүгэр барары былааннааччылар – 5%, Арассыыйа иһигэр барааччылар 3% кирэдьиит киирэн туран барара көстүбүт.

Ыйытыыга хоруйу ылыы бириэмэтэ да кырата суох оруоллааҕа чахчы. Онон суруйар тоҕоостоох – ыйытыгы ыам ыйын 11-20 күннэригэр ыыппыттар.

Дьэ, ити курдук, Юлия Моторыкина ыыппыт түмүктэриттэн сылыктаатахха, төһө да төлөпүөнүнэн түөкүннээһин улааппыт кэмэ буолтун иһин, Саха сирин олохтоохторо балай да  көхтөөхтүк кытталлар эбит. Итэҕэһэ диэн, төһө киһи кыттыбыта ыйыллыбатах. Итиччэ түмүгү оҥорор дьон ыйытыкка кыттааччы ирдэнэр кээмэйин тутуһан эрдэхтэрэ диэн сабаҕалыахха сөп.