Нэһилиэнньэ "Пушкин каартатын" сөбүлээн туһанар

“Пушкин каартата” Арассыыйа бэрэсидьиэнэ Владимир Путин көҕүлээһининэн олохтоммут “Дьиэ кэргэн” национальнай бырайыак иитинэн олоххо киирбитэ.

Бырагыраамаҕа билигин 191 култуура тэрилтэтэ, ол иһигэр 13 тыйаатыр, 19 түмэл уонна галерея, 132 тыа сирин кулууба, 9 библиотека, 3 киинэ тыйаатыра киирэн сылдьаллар. Пушкин каартатынан саамай элбэх билиэти атыылаабыттарга Саха тыйаатыра бастаан иһэр, онтон Нам улууһугар баар “Алгыс” норуот айымньытын киинэ, Национальнай художественнай түмэл, “Фанам-Синема” ХЭТ иһэллэр.

“Пушкин каартатыгар” атын култуура тэрилтэлэрин холбооһун салҕанар. Холобур, билигин Саха циркатын киллэрэн эрэллэр.

Пушкин каартатын 14-тэн 22 сааһыгар диэри эдэр дьон ылар бырааптаахтар. Бу каарта иһигэр 5 тыһ. солк. баар буолар – федеральнай бүддьүөттэн үбүлэнэр.  Хас сыл аайы туһанар кыах баар.

Ити 5 тыһ. солкуобайтан 2 тыһ. солкуобайыгар киинэ билиэтин ылыахха сөп.

“Пушкин каартатын" оҥотторорго Госуслуги порталыгар регистрацияланаҕыт. «Учетнай запиһы» бигэргэттэрэҕит. Суотабайга, ноутбукка «Госуслуги.Культура» сыһыарыыны хачайдыыгыт. Онно суруллубуту барытын толорбуккут кэннэ виртуальнай эбэтэр пластик «Пушкин каартатын» аныыллар.

Сыһыарыы көмөтүнэн афишаҕа киирэн, сылдьыаххытын баҕарар тэрээһиҥҥитин, киинэҕитин булаҕыт эбэтэр быһа Культура.РФ. порталга киирэҕит. Онно «Пушкин каартатынан» төлүүбүн диэни баттыыгын (Тугу баттыахтааҕыҥ, толоруохтааҕыҥ барыта тахсан иһиэҕэ).

Эбэтэр тэрээһин билиэтин атыылыыр каассаҕа сирэй тиийэн, эбэтэр тэрээһини ыытааччылар саайтарын нөҥүө атыылаһыахха эмиэ сөп. Киинэҕэ, тыйаатырга киирэргэр ол билиэккин уонна пааспаргын көрдөрөҕүн.

Үгэс курдук, култуура тэрээһиннэрин биллэриитигэр «Пушкин каартата дьайар» биитэр «Пушкин каартатынан киириэххэ сөп» диэн эбии быһаарыылаах буолар.

Бу каартаҕа баар харчы дьиэ кэргэн дохуотугар ааҕыллыбат, ол аата босуобуйа анатарга мэһэйдээбэт.

Каартаны тус анаммыт киһитэ эрэ туһанар бырааптаах. Атын киһи туһанара билиннэҕинэ, блокировкалыыллар. Каарта үбэ култуурунай тэрээһиҥҥэ сылдьарга эрэ туһаныллар, харчынан солбуллубат.