Саха сирин олохтоохторо бу өрөбүллэргэ 9 мөлүйүөнү түөкүттэргэ ыыппыттар

43 саастаах учуутал сымыйа брокерга итэҕэйбит уонна 19 күн устата харчытын ыыппыт. Түмүгэр кирэдьиит киирэн туран 622 тыһ. солк. сүтэрбит.

24 саастаах устудьуон кыыска Росфинмониторинг аатыттан эрийбиттэр. Кини түөкүттэргэ 315 тыһыынчаны ыыппыт.

19 саастаах устудьуон кыыс курьерга 5 мөл. солк. биэрэн ыыппыт. Киниэхэ массыанньыктар ФСБ-тан эрийэбит диэбиттэр. Полициялар суһал миэрэлэри ылан курьер ким буоларын быһаарбыттар.

54 саастаах электромонтажник сэттэ күн устата 2 мөл. 880 тыһ. солк. түөкүттэргэ ыыппыт. Киниэхэ  МФЦ, Росфинмониторинг, ФСБ үлэһиттэрэ буолан кубулунан хаста да эрийбиттэр.

Полиция Саха сирин олохтоохторун билбэт дьоҥҥут этиитинэн харчыны онно-манна ыыппаккытыгар  ыҥырар. Түөкүттэр сымыйа нүөмэрдэртэн эрийэллэр, харчыгытын ылаары киһи уйулҕатын баттыыллар, ыгылыталлар.

Төлөпүөнүнэн эрийэн тиийэр “баан үлэһиттэригэр”, “ФСБ-ларга” итэҕэйимэҥ!