Саха сирин дизайнера – Москубатааҕы муода нэдиэлэтигэр

Биир дойдулаахпыт үлэлэрин кулун тутар 16 күнүгэр 15.00 чаастан «Манеж» киин быыстапкалыыр саала 1 саалатыгар көрүөххэ сөп. Дизайнер архитектураны уонна айылҕаны дьүөрэлиир «Архитектура цветения» кэллиэксийэтинэн кыттыаҕа.

Москубатааҕы муода нэдиэлэтигэр кыттарга дойду 67 регионуттан тыһыынчаттан тахса сайаапка киирбит. Киэҥ далааһыннаах тэрээһин бырагыраамата баай: Арассыыйа уонна тас дойду дизайнердарын кэллиэксийэлэрин көрүү, маркет, шоурум, муода экспертэрин лиэксийэлэрэ уонна World Fashion Shorts кылгас кээмэйдээх киинэ бэстибээлэ ыытыллаллара күүтүллэр.

Манна барыта 200 кэриҥэ бренд кэллиэксийэтин көрдөрүөҕэ. Түмүктүүр тэрээһин кыттааччыларын эксперт сүбэтэ быһаарыаҕа. Онно муодаҕа аналлаах таһаарыылар сүрүн эрэдээктэрдэрэ, стилистэр, бөдөҥ ретейл-былаһааккалар төрүттээччилэрэ киирэллэр.