«Саха сирин амтана-2025»

Быйылгы дьүүллүүр сүбэ үлэтин-хамнаһын ыҥырыылаах ыалдьыт – Where to Eat Russia 100 бастыҥ рестораннарын ахсааныгар киирбит «Наше Место Камчатка» бырайыак бренд-шебэ, Chefs Team Russia вице-бэрэсидьиэнэ уонна норуоттар икки ардыларынааҕы таһымнаах кулинария судьуйата Павел Васильев иилээтэ-саҕалаата.

Куонкурус түмүгүнэн анал ааттары сэргэ кыайыылаах аатын «Өрөгөй» спорт уораҕайыгар буолбут кыһыҥҥы бырааһынньык тэрээһинигэр эттилэр.

Ол курдук, «Выбор гостя» ааты уонна «Мост» хампаанньа анал бирииһин «Махтал» ресторан хамаандата ылла.  

Оттон «За оригинальность и оформление подачи блюд в дегустационном сете» диэн бүлүүдэни көрдөрүүгэ бастыҥнарынан «Аsai» ресторан хамаандата ааттанан 30 тыһ. солк. суумалаах сэртипикээтинэн наҕараадаланна.

Салгыы «За лучшую презентацию дегустационного сета» аакка «Махтал» ресторан тигистэ,  эмиэ итиччэ суумалаах сэртипикээти тутта.   

Бастыҥ өҥөнү оҥорооччу «РекаОзероЛес» ресторан хамаандата «Лучшее обслуживание и сервис» аакка тигистэ уонна дипломунан, 30 тыһ. солк. сэртипикээтинэн наҕараадаланна. Бастыҥ хамаанданан үлэни көрдөрбүт «Дойдум Аha» кафе «За профессионализм и командную работу поваров» ааты ылан эмиэ итиччэ суумалаах сэртипикээти уонна диплому тутта.

«Kitchen» рестораҥҥа «За креативный и инновационный сет» ааты иҥэрдилэр, 30 тыһ. солк. туттардылар.

Оттон быйылгы «Саха сирин амтана-2025» гастрономическай куонкурус Гран-при кыайыылааҕынан Дмитрий Лунёв шеф повардаах «Тортуга» ресторан хамаандата буолла уонна кубогынан, 200 тыһ. солк. наҕараадаланна.