Саха сиригэр спорт 110 көрүҥэр дьарыктаналлар

Биһиги өрөспүүбүлүкэҕэ спорт салаата көхтөөхтүк сайдар. Сааһыттан тутулуга суох, эдэр-эмэн дьон сөбүлээн дьарыктаналларыгар анаан, тоҕоостоох усулуобуйа тэриллэр. Өрөспүүбүлүкэ олохтоохторо спорт 110 көрүҥэр дьарыктаналлар. Онуоха 68 спорт аккредитациялаах Федерацията үлэлиирэ төһүү күүс буолар.

Массабай спорду сайыннарыы – судаарыстыба суолталаах соруктарыттан биирдэстэрэ. «Арассыыйа спорда» судаарыстыба бырагырааматын уонна «Биир ньыгыл Арассыыйа» баартыйа «Оҕо спорда» бырайыагын чэрчитинэн, спортивнай эбийиэктэр, араас эгэлгэ тренажердаах былаһааккалар үлэлиилллэр. Күрэхтэһии, спорт маассабай тэрээһинэ тиһиги быспакка ыытыллар.

Владимир Путин физическэй култуураны уонна спорду сайыннарыыга Сэбиэт мунньаҕар: «Биһиги спорду талбыт дьону өйүөхтээхпит. Уонна, биллэн турар, иитии-үөрэтии барыахтаах, тренердэр, настаабынньыктар сөпкө уонна эппиэтинэстээхтик үлэлииллэрэ ирдэнэр, эдэр көлүөнэ күннэтэ спордунан дьарыктаныыта уонна эт-сиин туругар эппиэтинэстээхтик сыһыаннаһыыта күннээҕи олоҕун олоҕурбут көстүүтүгэр кубулуйуохтаах. Оҕо аймах доруобуйата – дойду инники кэскилэ», – диэн мээнэҕэ бэлиэтээбэт. Кэрэхсэбиллээҕэ, сыл аайы Саха сиригэр спорт саҥа, сонун хайысхалара киирэллэр.  Саха сиригэр, сыл иһигэр, ортотунан, 500-тэн тахса спорт официальнай күрэхтэһиитэ ыытыллар.

*2023 сылтан саҕалаан, СӨ спорт федерациялара судаарыстыба бүддьүөтүттэн субсидия ылаллар. Икки сыл иһигэр 56 федерация уопсайа холбоон 60 мөл. солк. судаарыстыба өйөбүлүн ылла.

*Физкултууранан уонна спордунан дьарыктанааччы ахсаана 5 сыл иһигэр 1,5 бүк улаатан, 62,5% тиийдэ.

Спорт миниистирэ Леонид Спиридонов:  «Спорт федерацияларын өйөөһүн салааны сайыннарыыга биир сүрүн инструмент. Ол көмөтүнэн уопсастыбаннай тэрилтэлэр күрэхтэһиини ыытарга, спортсменнары бэлэмнииргэ уонна спорт көрүҥнэрин киэҥник тарҕатарга кыттар кыахтаммыттара. Спорт тэрээһинигэр кыттааччы элбиир. Саҥа бырайыактар, көҕүлээһиннэр баар буолаллар, спорт хамсааһына кэҥиир».

Олохтоохтору спорка интэриэстэрин көҕүлүүргэ кэлим көрүҥ күрэхтэһиилэри ыытыы суолтата улахан.

Бэс ыйын 4-7 күннэригэр Дьокуускайга буолбут үлэ кэлэктииптэрин V спартакиадата 1057 кыттааччыны түмтэ.

Бэс ыйын 11-14 күннэригэр Саха сирин биэнсийэлээхтэрин V үбүлүөйдээх Спартакиадата буолаары турар. Бу – аҕам саастаах көлүөнэ  уһун үйэлэнэрин, чэгиэн буоларын туһугар ыытыллар үлэ биир көстүүтэ.

Бэс ыйын 17-21 адаптивнай спорт көрүҥнэригэр «Дьулуур» («Стремление») диэн XV спартакиада ыытыллыаҕа. Онно 750-тан тахса киһи кыттара былааннанар.

Бэс ыйын бүтүүтэ уонна от ыйын саҥатыгар Саха сиригэр оҕунан ытыыга Арассыыйа чемпионата буолуоҕа.

Эһиил Ньурбаҕа IX Спортивнай оонньуулар ыытыллыахтара.

«Биһиги маассабай спорду уонна үрдүк ситиһиилээх спорду тэҥинэн сайыннарабыт. Былырыын Таатта улууһун Ытык Күөл сэлиэнньэтигэр Манчаары оонньуулара ситиһиилээхтик ааспыттара.  11 спорт көрүҥэр 7 тыһыынчаттан тахса кыттааччы күрэхтэспитэ. Ону таһынан, үгэс курдук, кыһыҥҥы спорт көрүҥнэригэр Спартакиада, «Спортивные якутяне» үөрэнээччилэр Спартакиадалара, Хотугу норуоттар Оонньуулара, Арктика оҕолорун Оонньуулара уонна өрөспүүбүлүкэ спорт бөдөҥ аан дойдутааҕы бырайыага – «Азия оҕолоро» оонньуу ыытыллаллар», – диир спорт миниистирэ.

Спорт инфраструктуратын сайыннарыы, спорт федерацияларын үбүнэн өйөөһүн, улахан тэрээһиннэри ыытыы олохтоохтор көхтөөх  олоҕу талалларыгар уонна доруобуйаларын бөҕөргөтөллөрүгэр табыгастаах усулуобуйаны үөскэтэрин бэлиэтиир.

Леонид Спиридонов: «Түмүк баар:  5 сыл иһигэр спордунан дьарыктанааччы 1,5 төгүл элбээтэ. Биһиги статистиканан эрэ муҥурдаммакка, салгыы баран, бу эйгэҕэ хаачыстыбаны тупсарыах кэриҥнээхпит. Миэстэтигэр туһааннаах инфраструктураны кэҥэтэн, бүддьүөт тэрилтэлэрин эрэ буолбакка, чааһынай тэрилтэлэри барыларын кытыннарыахтаахпыт. Бу – спорт министиэристибэтэ муниципальнай уорганнары кытта ситиһиэхтээх тирэх соруктара буолар. Өрөспүүбүлүкэ Ил Дархана, “Биир Ньыгыл баартыйа” эрэгийиэннээҕи салаатын сэкиритээрэ Айсен Николаев Ил Түмэҥҥэ эппит Анал этиитигэр бэлиэтээн турар», – диэн, санаатын үллэстэр.

Бу туһунан СӨ Ил Дархан уонна Бырабыыталыстыба дьаһалтатын пресс-сулууспата суруйар.