Саха сиригэр саҥа тосхоллорунан үөрэх инфраструктуратын сайыннарыахтара

СӨ Бырабыыталыстыбатын бэрэссэдээтэлэ Анатолий Семенов РФ үөрэх миниистирин солбуйааччыта Андрей Николаевтыын көрсүһүүтүгэр Саха сирин үөрэх тэрилтэлэрин инфраструктуратын тупсарыы боппуруоһун көрдүлэр. 
Быйыл саҥа үлэлээн саҕалаабыт национальнай тосхоллор чэрчилэринэн Саха сиригэр 2025-2030 сс. оскуолалар, уһуйааннар, колледжтар курдук кэккэ эбийиэктэр тутуллуохтара, өрөмүөн үлэлэрэ ыытыллыахтара.
Ол курдук, "Дьиэ кэргэн" национальнай тосхолунан Уус Алдан, Амма, Горнай, Чурапчы, Нерюнгри, Мэҥэ Хаҥалас, Сунтаар улуустарыгар уонна Дьокуускай куоракка – барыта 14 оҕо уһуйаанын саҥардыахтара.
Оттон "Ыччат уонна оҕолор" тосхолунан уонна Дьокуускай, Нерюнгри куораттары сайыннарыы маастар-былаанынан федеральнай үбүлээһин суотугар Дьокуускай куоракка 12 оскуола, 13 оҕо уһуйаана, ону тэҥэ Нерюнгрига "Арктика" интэринээт-оскуола тутуллуохтара.
Маны таһынан Нерюнгрига, Үөһээ Дьааҥы, Булуҥ, Ньурба, Уус Алдан, Бүлүү, Сунтаар, Нам, Чурапчы, Томпо, Горнай, Хаҥалас, Алдан, Амма, Мэҥэ Хаҥалас, Анаабыр, Муома, Өлүөхүмэ уонна Уус Маайа улуустарыгар уонна Дьокуускай куоракка, Жатайга 37 оскуола өрөмүөннэниэ.
"Профессионалитет" федеральнай бырагыраама иитинэн Дьокуускайдааҕы педагогическай колледжка, Дьокуускайдааҕы тыа хаһаайыстыбатын техникумугар уонна Саха сирин соҕурууҥҥу колледжыгар өрөмүөн үлэтэ ыытыллыа.
"Ыйыллыбыт эбийиэктэри таһынан оскуолалары, оҕо уһуйааннарын уонна орто профессиональнай үөрэх тэрилтэлэрин өрөмүөннүүргэ үлэ салгыы барыа. Бу сырабыт оҕолор үөрэнэллэригэр табыгастаах усулуобуйаны тэрийэргэ үөрэх инфраструктуратын хаачыстыбата тупсарыгар туһаайыллар",  – диэн Андрей Семенов бэлиэтээн эттэ.
Санатар буоллахха, дойду бэрэсидьиэнэ Владимир Путин көҕүлээһининэн Арассыыйаҕа 2025 сылтан 2030 с. диэри саҥа 19 национальнай тосхол олоххо киириэ. 
Бу туһунан СӨ Ил Дарханын уонна Бырабыыталыстыбатын пресс-сулууспата иһитиннэрэр.