Саха сиригэр С гепатиты чинчийии диспансеризация бырагырааматыгар киирдэ

2025 сылтан С гепатиты быһаарар чинчийии диспансеризация бырагырааматыгар киирдэ, диэн СӨ доруобуйа харыстабылыгар министиэристибэтэ иһитиннэрэр.

С гепатиты кытта охсуһуу бырайыагын олоххо киллэрии Владимир Путин көҕүлээһининэн саҕаламмыт саҥа «Уһун уонна көхтөөх олох» нацбырайыак чэрчитинэн ыытыллар. Манна скрининг, диспансернай кэтээн көрүү, исписэлиистэргэ уонна ыарыһахтарга үөрэх, наада буоллаҕына, вируһу утары эмтээһин киирэллэр.

С гепатиттаах ыарыһахтары чинчийии уонна эминэн хааччыйыы диспансеризация чэрчитинэн олорор сирдэринэн поликлиникаларга босхо ыытыллар. Учуокка турар хас биирдии ыарыһахха эмтээһин уонна кэтээн көрүү тус былаанынан оҥоһуллар. Инники өттүгэр бу бырайыагынан Саха сиригэр номнуо НСV инфекциялаах 1,5 тыһыынча киһи эмтэммит. 2030 сылга диэри нэһилиэнньэ улахан дьонун 50% чинчийиини ааһыахтаах. Бүгүҥҥү күҥҥэ Саха сиригэр бу ыарыы учуотугар 6,5 тыһыынча киһи турар, диэн Ил Дархан уонна Бырабыыталыстыба пресс-сулууспата иһитиннэрэр.