Саха сиригэр искэн ыарыыны эрдэ быһаарыы 45% үрдээтэ

Манна саамай аныгы тэриллэр уонна тиһэх технологияларынан үлэлиир быраастар көмөлөһөллөр. Биэс сыл иһигэр Саха сиригэр искэн ыарыытын быһаарыы биллэ тупсубута бэлиэтэнэр. Саҥа үөскээһиннэри эрдэ булуу 45% үрдээтэ. Өлүү 34% намтаата. Тутаах төрүөтүнэн Уһук Илиҥҥэ биир бөдөҥүнэн биллэр СӨ Онкологическай диспансерын саҥа дьиэтин арыйыы буолар.

Билигин быраастар түөс эпэрээссийэтин 90%-тан тахсатын торакоскопическайдык (прокол нөҥүө), бүөр искэнин 90%-тан тахсатын лапароскопическайдык, ону тэҥэ колоректальнай уонна гинекологическай искэннэргэ оҥоһуллар эпэрээссийэлэр 70%-нарын кыратык киирэн (малоинвазивнай ньыманан) оҥороллор. Бу эчэйиини аччатар, эмтэнии болдьоҕун кылгатар уонна чөлүгэр түһүүнү түргэтэтэр. 2025 сылга 3 тыһыынчаттан тахса искэн түбэлтэтэ булуллубутуттан, 51%-на эрдэтээҥи стадиятыгар быһаарыллыбыт. Сыллата онкокииҥҥэ 4800-тэн тахса эпэрээссийэни оҥороллор. Пациеннар быраастар идэлэрин үрдүк таһымын таһынан, киһилии сыһыаннарын бэлиэтииллэр.