Саха сиригэр «Илии сылааһа -2026 » куонкурус 6-с төгүлүн ыытыллар

Анал байыаннай дьайыыга кыттааччыларга анаммыт таҥаһы тигээччилэр ортолоругар өрөспүүбүлүкэ таһымнаах куонкурус быйыл ыам ыйын 28 – бэс ыйын 8 күннэригэр буолар.

Манна, өйдөөбүккүт курдук, өрөспүүбүлүкэ араас муннуктарыгар олорор иистэнньэҥ дьахталлар СВО кыттыылаахтарыгар анаан байыаннай таҥас кэмпилиэгин тигиигэ күрэхтэһэллэр. Тэрээһин сүрүн сыала – байыастары уонна волонтер хамсааһынын сайыннарыыны өйөөһүн.

Куонкуруска муниципалитеттар уонна куорат уокуруктарын иистэнньэҥнэрэ хамаанда тэринэн, манна кэлэ сатаабакка, ыраахтан олорон кытталлар. Кинилэр «Эр хоһуун» диэн сайын кэтиллэр, уопсайа 14 суол таҥастаах кэмпилиэги тигиэхтээхтэр. Ол иһигэр киирэр: көстүүм, тактическай ырбаахы уонна бүрүүкэ, флис матырыйаалтан толстовка, футболка, балаклава, таҥас, сээкэй хаалыыр мөһөөччүк уо.д.а. Ити таҥастары тигэртэн ордубут матырыйаалтан эбии таҥаһы эмиэ тигэллэрэ биһирэнэр.

Хамаанда аайы 10 толору кэмпилиэк тахсар матырыйаала уонна фурнитурата бэриллэр. Хамаанданан күрэстэһиини таһынан «Муҥутуур сатабыллаах таҥас киэбин быһааччы (закройщица)» ааты ылар иһин күрэхтэһиэхтэрэ. Кыайыылааҕы быһаарарга таҥаһы оруойдаабакка, төһө кэмчилээн тигэрэ, киэп чопчута, кээмэйигэр төһө сөп түбэһэр гына быһара учуоттанар. Куонкурус түмүгүн таһаарыы үөрүүлээх быһыыга-майгыга ыытыллыа.

Куонкуруска тигиллибит, илии сылааһа, төрөөбүт дойду иһирэх иэйиитэ иҥмит таҥастар дойду интэриэһин хорсуннук туруулаһа сылдьар байыастарга тиэрдиллиэхтэрэ. Иһирэх илии сылааһа иҥмит таҥастар дьоммутугар күүстэригэр күүс, сэниэлэригэр сэниэ эбиллэригэр көмөлөһүө турдаҕа.

Бу туһунан Ил Дархан уонна Бырабыыталыстыба пресс-сулууспата иһитиннэрэр.