Саха сиригэр хаһан да ыытыллыбатах эпэрээссийэ оҥоһулунна

Конференция иитинэн Герцен аатынан Онкология институтуттан Азиз Зикиряходжаев бэйэтин хамаандатын кытта түөс пластическай эпэрээссийэтигэр маастар кылаас ыытта. Ол курдук, сэттэ сыллааҕыта искэн ыарыыттан эмиийин быстарбыт кэрэ аҥаарга бэйэтин иһин тириититтэн уонна сыатыттан түөһүн чөлүгэр түһэрии эпэрээссийэтин оҥордулар.

Саха сиринээҥи онкологическай диспансер хирурдара пластическай хайысханы баһылаан эрэллэр. Дьахтар улахан ыарыы кэннэ этэ-сиинэ, уйулҕата чөл буоларыгар бу сатабыл улахан оруоллаах диэн бэлиэтээн этэллэр.

Конференция кыттыылаахтарыгар Саха сирин хирурдара бүөргэ үөскээбит искэни түөрт сиринэн киирэн ылалларын, ол аата малоинвазивнай эпэрээссийэни хайдах оҥороллорун көрдөрдүлэр.

Санатан эттэххэ, Саха сирин киин куоратыгар өрөспүүбүлүкэтээҕи онкологическай киин 2024 сыллаахха арыллыбыта. Бу кэмтэн ыла искэни эмтээһин таһыма, чуолаан хирургия салаатыгар, биллэ үрдээтэ. Күҥҥэ 20 эпэрээссийэҕэ тиийэ оҥоһуллар буолла.

Статистика кэпсииринэн, искэнинэн ыалдьар дьон ахсаана, 2024 сыллааҕыны кытта тэҥнээн көрдөххө, 1,3% аччаабыт, ол эрэн уопсайа 5 сыл иһигэр искэн ыарыы булуллара 15,8 % үрдээбит.