Саха сиригэр анал байыаннай дьайыы кыттыылааҕын төрөппүттэрэ 657 киһи санаторнай-курортнай эмтэниини ааста

Анал байыаннай дьайыы кыттыылаахтарын төрөппүттэрэ 657 киһи санаторнай-курортнай эмтэниини ааста, диэн ыам ыйын 12 күнүгэр СӨ Бырабыыталыстыбатын бэрэссэдээтэлин солбуйааччы Георгий Степанов брифиҥҥэ иһитиннэрдэ.

Вице-премьер бэлиэтээбитинэн, Саха сиригэр олохтоох анал байыаннай дьайыы кыттыылаахтарын төрөппүттэригэр уонна эпэкииннэригэр 14 хонуктаах санаторнай-курортнай эмтэниигэ көмө үс сылга биирдэ мунньуллар бырааба суох ананар. 

Харчынан төлөбүр быһыытынан көмө Саха Өрөспүүбүлүкэтигэр баар санаторий-профилакторийдарга, маны сэргэ өрөспүүбүлүкэ тас өттүгэр Москуба уобалаһыгар «Бэс Чагда» санаторийга путевка сыанатын кээмэйинэн, ол эрээри 60 тыһ. солк. элбэҕэ суох, эбэтэр олохтоох ороскуоту толуйуу бэрээдэгинэн, эбэтэр путевка сыанатын 80 % кээмэйинэн оҥоһуллар. 

Саха Өрөспүүбүлүкэтигэр маны сэргэ буойуттар дьиэ кэргэттэригэр аадырыстаах көмө оҥоһуллар. Георгий Степанов бэлиэтээбитинэн, бүгүҥҥү күҥҥэ 184 дьиэ кэргэҥҥэ гаас киллэртэрэллэригэр материальнай көмө оҥоһуллубут, 501 киһи байыаннай сулууспалаах аймаҕа эмтэнэр сиригэр баран кэлбит. 1 250 буойун уонна 2 208 кинилэр дьиэ кэргэттэрин чилиэннэрэ медицинскэй уонна социальнай  реабилитацияны ааспыттар. 444 киһи социальнай тэрилтэлэр өҥөлөрүнэн туһаммыт.
766 киһи дьарыктаах буолуу кииниттэн үлэ көрдөөбүт, ол иһигэр 287 анал байыаннай дьайыы кыттыылааҕа уонна 479 кинилэр дьиэ кэргэттэрин чилиэннэрэ. Мантан 161 киһи идэ ылар үөрэххэ киирбит, 446 киһи үлэ миэстэтинэн хааччыллыбыт, диэн иһитиннэрэр Ил Дархан уонна Бырабыыталыстыба пресс-сулууспата.