Саха сиригэр ааспыт сылга 7000 кэриҥэ аборт оҥоһуллубут

Оҕо түһэртэрии төрүөтэ араас. Экспертэр этэллэринэн, биир үксүн сарсыҥҥы күҥҥэ эрэлэ суох буолуу, үп-харчы кырыымчыга, дьиэ-уот кыһалҕата кыһарыйар. Уонна... сороҕор дьахтар эрин кытта кыыһырсан баран оҕо түһэртэрэ тиэтэйэр.

Быһа түһэн эттэххэ, Саха сиригэр ааспыт сылга 7000 кэриҥэ аборт оҥоһуллубут. Тэҥниир буоллахха, 2000 сыллар саҕаланыыларыгар оҕо түһэртэрии сылга 40 тыһыынчаҕа тиийэ сылдьыбыт. Ити төрүүр оҕо ахсаанынааҕар икки бүк элбэх!

Тохсунньу 28 күнүгэр СӨ Уопсастыбаннай палаататыгар «Аборт, как межведомственная медико-социальная проблема: что делается и что необходимо решить» диэн мунньах буолан ааста. Социальнай политикаҕа, демографияҕа, дьиэ кэргэн уонна оҕо аймах көмүскэлигэр хамыыһыйа бэрэссэдээтэлэ Лена Павловна Ефремова эппитинэн, бу дьүүллэһии бэҕэһээ эрэ күөдьүйбэтэҕэ, үһүс сылын уҕараабат.

Ааспыт сыл бүтүүтэ Дьокуускайга Арассыыйа Уопсастыбаннай палаататын чилиэнэ, “Женщины за жизнь” пуонда бэрэсидьиэнэ, эксперт Наталья Игоревна Москвитина кэлэн барбыт. Кини дьахтар консультацияларыгар сылдьан тутулуга суох бэрэбиэркэни ыыппыт. Итиэннэ чааһынай клиникалар “чуумпуруу нэдиэлэтин” тутуспаттарын, дьахтары кытта кэпсэтии, өйдөтүү үлэтэ ыытыллыбатын быһаарбыт. Чааһынай клиникаларга бу өҥө олус дөбөҥ, этэргэ дылы, дьахтар үлэтигэр баран иһэн оҥорторуон сөп диэбит.

Уопсастыбаннай хонтуруол түмүгүнэн судаарыстыбаннай тэрилтэлэргэ ити ирдэбил барыта тутуһуллара бэлиэтэммит. Итиэннэ Дьокуускай куорат 3-с уонна 2-с нүөмэрдээх балыыһаларыгар “Здесь заботятся о беременных” бэлиэ туттарыллыбыт.

СӨ Доруобуйа харыстабылын миниистирин солбуйааччы Татьяна Юрьевна Павлова иһитиннэрбитинэн, оҕо түһэртэриини эрдэттэн сэрэтэр уонна аҕыйатар үлэ тиһигин быспакка ыытыллар. Саха сиригэр аборт сыллата аҕыйаан иһэр. Ол курдук, балыыһаларга клиническэй психолог, медико-социальнай арыаллааһын хосторо үлэлииллэр. 2014 сылтан медицина судаарыстыбаннай тэрилтэлэригэр оҕо түһэртэрэр санаалаах дьахталларга психолог консультацията киирбит, ол түмүгэр кэлбит дьахталлар санаалара уларыйан, төрүүргэ быһаарыналлара үгүс.

Мунньахха Доруобуйа харыстабылын министиэристибэтин биэдэмистибэлэр икки ардыларынааҕы үлэтэ көдьүүстээҕэ бэлиэтэннэ. Холобур, бу хайысхаҕа Үлэ уонна социальнай сайдыы министиэристибэтэ, Нэһилиэнньэ дьарыктаах буолуутун судаарыстыбаннай кэмитиэтэ кыттыһар.

2024 ч. – 501 оҕо олоҕо быыһаммыт. 2025 сыл 11 ый түмүгүнэн – 389 оҕо.

2024-2025 сс. Булуҥ улууһугар биир даҕаны аборт оҥоһуллубатах.

Үс чааһынай клиника аборт оҥорортон аккаастаммыт

Алтынньыга доруобуйа харыстабылын миниистирэ Лена Афанасьева чааһынай клиникалар лицензияттан аккаастаналларыгар этии киллэрбитэ. Бүгүҥҥү туругунан “Яннамед”, “Аврора”, “Кристалл” клиникалар бу көҕүлээһини өйөөн, баҕа өттүнэн аборт оҥорортон аккаастанан олороллор.

Билиҥҥи туругунан Дьокуускай куоракка 16 чааһынай клиника аборт оҥорор лицензиялаах.

Манна даҕатан эттэххэ, “чуумпуруу нэдиэлэтэ” диэн өйдөбүл баар. Ол эбэтэр дьахтар толкуйданарыгар, быһаарыныы ылынарыгар бириэмэ бэриллиэхтээх. Хомойуох иһин, чааһынай клиникаларга бу үлэ ыытыллыбат, статистика чахчылара, иһитиннэрии суох.

Итиннэ “Центромед” уонна “Добромед” клиникалар бэрэстэбиитэлэ: “Чааһынай клиникалары хонтуруоллуур уорганнар бэрэбиэркэлииллэр. Бүгүн биһиги оҕо түһэртэриини бобуу туһунан кэпсэппэппит, иһитиннэрэр, быһаарар тиһиктээх үлэ ыытыллыахтааҕын дьүүллэһэбит”, – диэн хоруйдаата.

Хамыыһыйа мунньаҕар оҕо түһэртэрэ кэлбит дьахтары кытта биирдиилээн үлэ хайаан да ыытыллыахтааҕа элбэхтэ этилиннэ. Бу тиэмэ киһи баарын тухары баар буолуоҕа.. Туох да диэбит иһин, оҕолонору эбэтэр аккаастанары дьиэ кэргэн  бэйэтэ эрэ быһаарар. Арай статистика чахчыта хаҥаабатар ханнык...