Саха сирэ уонна Беларусь киинэ эйгэтигэр кэскиллээҕи кэпсэттилэр

Көрсүһүү түмүгүнэн «Сахафильм» генеральнай дириэктэрэ  Алексей Егоров уонна «Беларусьфильм» генеральнай дириэктэрэ Дмитрий Семенов бииргэ үлэлиир, киинэ устар туһунан сөбүлэҥҥэ илии баттаатылар.

«Беларусьфильм» хампаанньа Дьокуускайга ыытыллыбыт норуоттар икки ардыларынааҕы киинэ бэстибээлигэр кыттыбыта, хайыы үйэ онно кыттыгас бырайыак туһунан кэпсэтии барбыта. Ону олоххо киллэрэн саҕалыыбыт: кыттыгас киинэбитин устуохпут, сценарийбыт номнуо баар, икки өттүттэн режиссёрдарбытын быһаарбыппыт. Билигин киинэ чопчу аатын этэр кыахпыт суох, ол эрээри уопсай сыаннастары таарыйар, норуоттар доҕордоһууларын уонна сырдык историяны кэпсиир киинэ буолуохтаах. Былааммыт барыта хайаан да олоххо киириэ, Арассыыйа уонна Беларусь көрөөччүлэрэ бу киинэни улахан экраҥҥа көрүөхтэрэ диэн эрэнэбит, – диэтэ «Сахафильм»   генеральнай дириэктэрэ Алексей Егоров.

«Беларусьфильм» салайааччыта Дмитрий Семенов кэпсээбитинэн, устуу үлэтэ эһиил саҕаланыаҕа.