Саха сирэ Уһук Илиҥҥэ туристар талаһар регионнарын быһыытынан үс бастыҥ иһигэр киирдэ

Саха сирэ бу индекс көрдөрүүтүнэн Уһук Илиҥҥэ – үһүс, дойду үрдүнэн 16-с миэстэни ылла, диэн СӨ урбааҥҥа, атыыга-эргиэҥҥэ уонна туризмҥа министиэристибэтэ иһитиннэрэр.

Чинчийии көрдөрбүтүнэн, турист талаһыытын индексэ 0,36 буолбут – Приморскай кыраай уонна Камчатка кэнниттэн. Арассыыйаҕа Севастополь куораты, Тамбов уобалаһын уонна Забайкалье кыраайын кытта биир таһымҥа турабыт.

Саха сирэ, билэн турар, ордук кэрэ, тыытыллыбатах айылҕатынан туристары угуйар.

Санатан эттэххэ, билигин «Туризм уонна ыалдьытымсах буолуу индустрията» национальнай бырыайыак үлэлиир, туризм өттүгэр бэйэ дьыалатын саҕалыыр олохтоох урбаанньыттар кэмигэр көмө ылар кыахтаахтар. 2025 сыллаахха Саха сиригэр туризмы сайыннарыыга 30 мөл. солк. тахса суума көрүллүбүт.