“Саха сирэ эйигин кытта!” хамсааһын актыбыыстарын, волонтердарын чиэстээтилэр

Дьокуускайга “Тыыл – Кыайыыга өйөбүл!” үөрүүлээх тэрээһин буолан ааста. Куорат Олохтоох дьаһалтатыгар Кыайыы туһугар сүдү кылааттарын киллэрэр волонтердар муһуннулар.  

Тэрээһиҥҥэ Дьокуускай куорат Дууматын бэрэссэдээтэлэ Альберт Семенов уонна куорат баһылыгын солбуйааччы Владимир Аржаков кыттыыны ыллылар. Кинилэр анал байыаннай дьайыы кыттыылаахтарыгар волонтердар тугунан да кэмнэммэт сүҥкэн улахан көмөлөрүн бэлиэтээтилэр, дириҥ махтал тылларын анаатылар.   

Владимир Аржаков “Саха сирэ эйигин кытта!” хамсааһын хара тэриллиэҕиттэн куорат олохтоохторо көхтөөхтүк кытталларын, бу Ийэ дойдуга бэриниилээх буолуу туоһута буоларын эттэ. Итиэннэ хамсааһын бүтүн Саха сирин барытын, хайыы үйэ икки тыһыынчаттан тахса киһини хабарын  бэлиэтээтэ. Ол курдук, волонтердар үлэлэрэ киэҥ: гуманитарнай көмөнү хомуйуу, наадалаах экипировканы тигии, маскировочнай сиэккэлэри өрүү уо.д.а. Кинилэр истиҥ сыһыаннара, уҕараабат кыһамньылара байыаннай сулууспалаахтарга – анал байыаннай дьайыы кыттыылаахтарыгар күүс-көмө буолар.

Үөрүүлээх тэрээһиҥҥэ Кыайыы туһугар дьоһун кылааттарын киллэрбит волонтердарга уонна уопсастыбанньыктарга СӨ Ил Дарханын, Бырабыыталыстыбатын, Судаарыстыбаннай Мунньаҕын (Ил Түмэн), Дьокуускай куорат Дууматын, Дьокуускай куорат Олохтоох дьаһалтатын, “Биир ньыгыл Арассыыйа” паартыйа  Бочуотунай грамоталара уонна Махтал суруктара туттарылыннылар.

Хаартыска: Олохтоох дьаһалта пресс-сулууспата